Recientemente e organisacion CEDE Aruba a reuni cu formadornan Gerlien Croes y Mike Eman pa introduci un biaha mes e organisacion, kico ta e trabou cu nan ta haci y tambe presenta nan meta- y preocupacionnan.

Den su declaracion na prensa despues di e reunion Daniel Tecklenborg director CEDE Aruba a splica cu e meta di organisacion durante e reunion tabata na prome luga pa introduci CEDE Aruba un bes mas y splica nan trayectoria largo di casi 50 aña.

Otro punto cu e organisacion a trece dilanti ta su rol den comunidad. El a sigui splica cu CEDE ta un organisacion di desaroyo cu ta enfoca riba financiamento. CEDE ta trece fondonan di afo y hunto cu un aporte di gobierno pa NGO nan ta eherce nan trabou y desaroya iniciativanan cu ta basa den comunidad.

“Nos a crece den capacity building, nos ta duna sosten y train otro organisacionnan, nos ta haci hopi mas proyectonan colaborativo, y tambe nos ta carga nos propio programanan den comunidad. Dus ta hopi importante pa splica kico CEDE ta haci y ki balor CEDE Aruba tin door cu nos tin un cantidad grandi di partner internacional cu ta traha cu nos y cu ta beneficia un grupo grandi na Aruba,” Teclenborg a indica.

El a sigui splica cu CEDE tin un protocol caba cu gobierno, y tambe cu fondonan di afo, y a propone na gobierno pa mehora e aliansa entre CEDE Aruba cu gobierno. Esaki, Tecklenborg a indica, ta pasobra nan ta tumando basta responsabilidad den cuadro di trabou di bario, den cuadro di apoyo na gruponan di boluntarionan na Aruba, apoyo na organisacion nonprofit den diferente area.

“Nos ta haciendo basta trabou eynan. Un banda nos ta sinti cu esaki ta un trabou di comunidad cu mester su apoyo. Ta importante cu tur hende mester ta uni y eynan nos ta haci nos trabou y nos kier un aliansa cu gobierno eigenlijk pa traha manehonan nobo cu ta dedica na e problemanan social na Aruba y un tiki mas structural pa yega na miho solucion. Nos no tin solucion pa tur cos pero mi ta kere hunto ora bo ta co-crea bo ta yega na solucionnan,” el a remarca.

Tecklenborg a indica cu otro punto cu a trece dilanti y cu a pidi gobierno ta pa den siguiente aña traha riba mehoracionnan di por ehempel acceso na servicionan di gobierno pa gruponan cu no tin acceso na dje. El a duna como ehempel cu tin cierto departamentonan di gobierno na unda personanan por yega pa ayudo solamente di nan tin un paspoort Hulandes. El a menciona cu esaki ta un topico cu na e momentonan aki, cu cierto instancianan cu tabata depende di gobierno di Merca a perde financiamento, a bira mas vital.

El a sigui indica cu durante e reunion nan a papia tambe tocante e necesidad di mehora e sistema di subsidio pa fundacionnan na Aruba. Esaki, el a menciona, ta un tema cu hopi aña ta ser discuti y ta un tema cu mester di atencion. El a remarca cu e fundacionnan na Aruba ta haci trabou importante, y toch e sistema di subsidio no ta efectivo pa nan y, for di su punto di bista, pa gobierno tampoco, pues ta un punto importante cu mester ser atendi tambe den e siguiente añanan.

“Un bon combersacion. Nos tabatin tur chance di introduci nos mes, contesta pregunta, bon ambiente y mi ta kere mas detaye mester traha riba dje na unda ora gobierno forma y na unda ministernan lo ta encarga cu nan cartera por sigui discuti esakinan,” el a bisa.

Contestando pregunta di pregunta di prensa si ta bon pa gobierno tuma algun responsabilidad over for di e organisacion, Tecklenborg a splica cu esey ta hustamente loke nan no kier. El a sigui splica cu hopi biaha tin un comunidad di Aruba cu tin asina hopi iniciativa y tin asina boluntad pa haci cosnan riba nan mes, cu no tin rason pakico gobierno lo tuma esaki over. El a subraya cu esey ta hustamente e momento pa apoya y empodera nan pa sigui haci nan trabou y asina gobierno por enfoca riba e problemanan mas grandi.

“CEDE Aruba no tin un tarea pa duna ayudo individual, esaki ta unda gobierno por hunga su rol y hopi cos bo por haci den partnership, pero e ta bon pa clarifica rolnan bon y si nos tin tur e financiamento di afo cu kier draag bij na e actividad, gobierno no lo hay’e, esey ta algo cu CEDE por hustamente nifica pa gobierno den futuro. Nos ta hopi contento cu nos rol, nos kier sigui traha riba dje, nos ta habri pa feedback, nos ta habri pa puntonan di mehoracion semper y nos tin un ekipo hopi dedica dus nos kier sigui riba nos caminda,” el a finalisa.

Durante nan reunion cu ex-formador di gobierno, Evelyn Wever-Croes, na aña 2021 e director di CEDE Aruba a trece dilanti e necesidad pa mehora y modernisa e sistema di financiamento di fundacionnan.

Un aspecto cu e aña aki Tecklenborg a indica a mehora y crece, ta e capacity building. Durante reunion cu ex-formador den 2021 esaki tabata un punto cu a trece dilanti cu tabatin mester di mehoracion.

Un tema cu tambe a trece dilanti den 2021 y cu pa algun tempo caba a mira un mehoracion ta maneho di centronan di bario. Bario Unico ta un proyecto cu e organisacion a introduci pa mehora e aspecto aki. Un di e metanan crucial di e proyecto aki ta pa fortalece e comunidad di e isla, duna centronan di bario y otro organisacionnan e recurso y hermentnan necesario pa crea un impacto social positivo.