Diamars atardi durante un rueda di prensa di CEDE Aruba Sra. Elsa Krosendijk, Project Cordinator Pitch Time, a presenta e proyectonan ganado di e competencia di ‘Pitch Time – Bario Edition’. Un total di 20 proyecto a participa y na final a scoge 11 proyecto ganado di diferente bario di Aruba.

Pitch Time ta un proyecto den su segundo edicion di ‘Bario Edition’, na unda cu hobennan ta haya e oportunidad di trece proyectonan den nan bario dilanti y asina wak con nan ta trek otro hobennan pa haci algo positivo pa nan bario, pa nan mes y asina crea tambe hobennan lider den nos comunidad. “Esey ta e meta principal y tambe pa yuda den e parti social den cada bario na Aruba”, Sra. Krosendijk a bisa.

Sra. Krosendijk a splica cu cada proyecto ganado a ricibi un suma di 5 mil florin for di nan sponsor pa asina eherce e proyecto den nan bario. Di e 11 proyectonan ganado, dos proyecto a resalta entre e otronan y e proyectonan aki a ricibi 5 mil florin extra for di otro sponsor, ricibiendo en total un suma di 10 mil florin.

Durante di un siman largo e proyectonan a competi contra otro y durante di fin di siman a anuncia e proyectonan ganado ariba social media y durante e rueda di prensa e hobennan a conoce e sponsornan di nan proyectonan.

“Durante e encuentronan cu e hobennan tabatin nos a siña conoce diferente tipo di hobennan, caracternan diferente, pero mas principal ta cu den e proyecto aki nos por bisa cu 80% di e hobennan ta prome biaha cu nan lo haci trabaonan boluntario den comunidad, sea como lider of como ayudante di un di e lidernan, y nos kier yama nan bon bini pasobra esey kiermen cu nos meta ta wordo alcansa”, Sra. Krosendijk a indica.

Segun el a splica e hobennan tin un periodo di 6 pa 7 siman pa cuminsa cu nan proyectonan, tin cu a cuminsa caba, y durante e periodo aki nan lo wordo guia mas segun nan sponsornan ta yuda nan. Sra. Krosendijk a gradici e sponsornan Setar Aruba NV, Aruba Bank NV, FCCA y AAA.

Un di e proyectonan ganado cu a resalta y conmove hopi hende durante su presentacion, y a logra ricibi un suma total di 10 mil florin for di nan sponsor AAA y Setar Aruba NV, ta e proyecto titula ‘Every Mind Matters’ di e hoben Cindy Jansen di e bario di Sero Pita.

Sra. Krosendijk a splica cu e meta principal di e proyecto aki ta pa crea un grupo di apoyo, cu ayudo profesional, unda cu por yuda e hoben ariba e tereno aki, y e grupo di apoyo ta di hoben pa hoben. E proyecto ta basa ariba diferente topiconan cu ta atende cu salud mental, enfoca ariba hobennan cu no ta papia facilmente di nan problemanan y no ta confia hende cu nan dolor, ansiedad, negligencia of otro problemanan social.

E segundo proyecto cu tambe a resalta durante su presentacion y tambe a ricibi un suma di 10 mil for di su sponsornan Aruba Bank NV como tambe Setar Aruba NV, ta e proyecto titula ‘Step It Up’ lidera pa e hoben Rafael Garcia di e bario di Bushiri.

E proyecto aki cu lo duna balor na e materia di CKV (Cultere en Kunstzinnige Vorming) enfocando ariba expresion di arte a traves di baile cu lo por yuda hobennan cu ansiedad, problemanan social y emocional. E proyecto lo organisa competencianan di baile di diferente genero baile na e scolnan secundario y e entrada di e competencianan lo ta destina pa yuda scolnan cu mester di material pa por sigui cu e materia di CKV. Lo brinda e hobennan lesnan tocante salud y educa nan ariba e importancia di socialisa sanamente.

E final di e ‘Pitch Time – Bario Edition’ lo tuma luga dia 6 di november na Cas di Cultura.