Expertonan kibrando cabes pa caso di defecto di Zika na baby recien naci.
Hende muhe na estado mester considera pa retrasa viahenan planifica pa Latino America y islanan den Caribe cu recientemente ta afecta pa e virus di Zika. Dokternan na Merca mester tene bista pa hende cu sintoma di Zika, Centers for Disease Control and Prevention a bisa.
Ainda no ta cla si e virus ta causa defecto di nacemento severo pero mientrastanto, probablemente e ta mas sigut pa hende muhe na estado keda leu, segun e agencia. “Te ora cu nos sa mas, y como medida preventico, CDC ta recomenda pa precaucion special wordo tuma pa tur hende muhe na estado of cu ta purbando di sali na estado.” Fuente di noticia NBC
Anteriormente Zika nunca tabata conoci pa ta causa defecto di nacemento of cu e ta un malesa pisa. De hecho, tres cuart di hende cu haya Zika no sa mes cu nan a haye. Sinembargo desde cu el a aparese na Brazil na mei ultimo, oficialnan a mira un aumento den e cantidad di caso di microcephaly, un defecto di nacemento cu ta causa cu e cabes y celebro no ta desaroya completo.
Microcephaly ta mata baby, ta causa aborto y babynan cu sobrevivi, hopi biaha ta deshabilita. Segun autoridad di salud na Brazil, mas cu 3500 caso di microcephaly a wordo raporta na Brazil entre october 2015 y januari 2016.
