CDA y AVP tin algo prepara pa gobierno nobo?

Diabierna pasa durante rueda di prensa di CAft, cu na cabes su presidente nobo, Raymond Gradus, prensa a puntra si e ta continua e ‘trato di handschoen di felpa’ cu su antecesor prof. Bakker tabata aplica. El a core duna un splicacion diplomatico, sin convence totalmente. El a declara di lo ta fuerte pero fair cu tur isla y no hiba diferente maneho na diferente isla. Esey por interpreta asina cu por tin un cambio di maneho unda Aruba por conta cu e mesun maneho fuerte y sin misericordia, cu a hiba te awor na e otro islanan? Esey por ta asina. Sin embargo, di cierto forma, lo ta bon pa hustamente continua e maneho di Bakker, pa trata Aruba cu cierto consideracion…

Por constata cu te awor a laga e gobierno cu ta sinta ainda te fin di e luna aki, inventa yen di triki, pa evita realmente restructura y limita gasto na un manera sensato, sin cu CAft a recomenda medidanan pa obliga gobierno cumpli cu e acuerdonan haci. Manera e cortamento di 5% di gasto di personal cu nunca a tuma luga. Of e triki di e asina yama ‘kwijtschelding’ di mas di 60 miyon florin di debe cu SVb, cu no ta un kwijtschelding pasobra ta gobierno a hiba un cambio di ley parlamento, pa pordona su mes e suma aki. SVb no tin e facultad legal pa otorga gobierno esaki. Actualmente nos a yega na e punto cu no por sigui cu e tipo di wega aki mas. E ultimo triki den e serie aki, e fake presupuesto 2017 cu tabatin yen di cifra exagera aden, basa riba un hyperactividad na e refineria cu por lo menos un par di mil trahado, no a resulta berdad y e corant aki tabata un di e poco medionan cu a mustra nan duda serio den e farsa cu gobierno tabata construi cu e reapertura di e refineria.

Anto net awor cu tur esaki ta bin na claridad di dia, y cu mester bay contempla e consecuencianan grave di tur esaki pa caha di gobierno, nos ta haya un cambio di gobierno. Algo cu tin su parti bon, pasobra e ta significa cu a logra haci loke na Gran Bretaña nan ta yama ‘throw the rascals out.’ No ta importa kico ta bin, pero mester get rid di loke ta sinta ta malogra e pais. Pero lo no ta straño si net awor, cu mester drecha loke e hendenan aki a daña, nos ta bay haya un maneho firme y aparentemente husto, mientras cu e gobierno nobo merece un poco flexibilidad pa e rotzooi cu nan mester ruim op? No mester canta gloria demasiado tempran, pasobra e gobierno nobo tin un par di problema na caminda.

Uno ta cu pronto lo tin un gobierno nobo na Hulanda cu e partido democrata cristian CDA aden. E pio cu por sucede ta si nos haya un ministro encarga cu Asunto di Reino di e partido aki, pasobra e ora AVP lo tin miho comunicacion cu e ministro na Den Haag, cu gobierno di Aruba mes. Cu tur consecuencia di esaki. No lubida cu laga gobierno di Mike Eman haci loke nan tabata kier a cuminsa caba durante e ultimo gabinete Balkenende, y despues den e prome gabinete di Rutte, tambe cu CDA aden, te 2012, unda nan tabata encanta cu nan coleganan di AVP a logra goberna nan so. Nos por corda cu despues, cu cada incidente cu tabatin, ta CDA y D’66 tabata esunnan cu tabata haci mas bochincha na fabor di Mike Eman, manera den e dianan di welga di hamber.

Pa colmo, tirando un bista riba curriculum di Raymond Gradus, nos por mira cu e tambe ta di cuna democrata cristian, y hasta ta director di e Instituto di Investigacion di CDA, y tambe profesor den Administracion Publico na Vrije Universiteit na Amesterdam, e baluarte academico di democracia cristian na Hulanda. Cu esaki nos no ta bisa cu e ta incapaz pa analisa cos na un manera obhetivo, pero cu e ta tuma un posicion neutral ta algo cu nos mester mira ainda. Di tur manera ta importante pa tene cuenta cu e aspectonan aki.

Ta importante tambe pa e gobierno nobo di Aruba, si e informacion y formacion bay den direccion cu nos ta kere y pronto tin un gabinete nobo, cuminsa prepara pa e guera di trinchera aki cu por cuminsa pronto. Un di e prome medidanan cu mester tuma, ta exigi cu e gobierno nobo mester nombra su mes representante nobo den e colegio di supervision aki.

Den tur e coro di disonante aki, tin un noticia cu ta sirbi di contrapeso: esey ta e decision cu gobierno Hulandes a tuma algun tempo pasa caba, cu ta cuminsa pone un stop na e corupcion galopante riba tur tres isla: Aruba, Curaçao y St. Maarten. Nos por imagina cu e partidonan aliado democrata cristian por purba pa haci bida di e gobierno nobo imposibel, pero e caso Ibis inevitabelmente ta bay pone ‘handel en wandel’ di e partido berde den un luz sumamente negativo. Esey na Hulanda ta dificil pa bende.