Celebracion di Dia di Betico ta yegando y en conexion cu e dia nacional aki, Comision Celebracion di Dianan Nacional (CCDN) a informa pueblo di Aruba tocante e actividad cu lo tin pa e diana benidero relaciona cu e celebracion di Dia di Betico.

Comision Celebracion di Dianan Nacional (CCDN), Departamento di Cultura y Ministerio di Cultura un ta preparando pa organisa eventonan en conexion cu e dia nacional, 25 di januari.

Presidente di CCDN, Lyonel Dirksz, a informa cu e prome actividad lo tuma luga diadomingo awo, 22 di januari, pa habri e siman di celebracion di Dia di Betico. E siguiente actividad lo tuma luga dia 24 di januari, un dia prome cu Dia di Betico. E dia aki lo tin e manifestacion cultural cu lo tuma luga ariba Plaza Betico Croes cuminsando for di 6:30 di atardi na unda ta bay tin benta di cuminda, benta di cos dushi, artesania y mas.

Segun Dirksz a indica, a compronde for di e comision di tent cu ya caba no tin mas espacio pa personanan cu lo kier bende cos dushi y cos di come mirando cu despues cu e comunicado a sali den medionan di comunicacion, den un rato a logra yega na 35 grupo di persona cu ta bay tin un tent disponibel pa e dia aki.

“Esey kiermen cu ta bay tin hopi cos di come, hopi cos dushi, artesania local ariba Plaza Betico Croes cuminsando for di 6:30,” Dirksz a indica.

E actividad lo cuminsa suave cu musica di caha di orgel, sigui pa Tipico Brindis y pa 8or di anochi e programa oficial di e manifestacion cultural ta cuminsa. Durante e programa oficial lo ricibi e mandatarionan di nos isla, ta bay tin e concierto cultural cu e aña aki ta bao guia di e maestro Raul Piar. E concierto cultural ta bay conta cu por lo menos 14 artista invita di diferente generacion y diferente dad cu ta bay presenta diferente cancionnan di Aruba y cancion cu ta papia di e lucha di Libertador Betico Croes.

Dirksz a splica cu e programa ta bay ta varia cu discurso, baile, poema y finalmente lo clausura e anochi di manifestacion cultural cu presentacion di e maestro internacional, musico local, Robert Jeandor hunto cu su grupo Robert y su Solo Banda Show.

Despues di e manifestacion cultural lo prepara pa e celebracion e siguiente dia cu ta e Dia di Betico y esaki ta cuminsa for di 9or di mainta. “Un biaha mas ta invita henter e comunidad pa ta riba Plaza Betico Croes unda cu lo tin e ceremonia protocolario,” el a enfatiza.

E ceremonia protocolar lo conta cu presencia di su excelencia Gobernador di Aruba, Alfonso Boekhoudt, e mandatarionan di nos isla y cu presentacion di e grupo di coro bao encargo di Edselyn Figaroa.

Ta bay tin dedicacion di poema, discurso di e mandatarionan y ponemento di flor na e estatua di Libertador Betico Croes manera ta custumber.

“Den nomber di Comision Celebracion di Dianan Nacional nos ta haci un invitacion na nos comunidad pa asisti na e dos dianan grandi aki, e manifestacion cultural y tambe e mainta di e ceremonia protocolar. Tur esaki lo tuma luga riba Plaza Betico,” Dirksz a remarca.

Sr. Junior Arends, miembro di CCDN, a elabora ariba e actividad cu lo tuma luga diadomingo 22 di januari cu ta bay enfoca ariba celebracion den famia.

Arends a splica cu aña pasa Aruba tabata den temporada di pandemia y esey a haci cu no por organisa actividadnan publico. Despues di un aña Dia di Betico ta wordo celebra un biaha mas publicamente ariba Plaza Betico Croes na unda henter e pueblo di Aruba por asisti y participa.

El a recorda cu aña pasa nan bin cu un proyecto innovativo pa locual ta trata famia y pa scolnan, cual ta e competencia di Kibra Coco y radio, via television y medionan social por a participa hunto cu famia pa no solamente amplia e conocemento tocante Betico Croes, pero tambe na mesun momento pasa ratonan agradabel den famia y gana premio.

Pa e aña aki, Arends a sigui splica, nan a dicidi, mirando e hecho cu ya no tin restriccion pa motibo di e pandemia y por haci actividadnan publico, di introduci un sistema nobo, cual ta Kibra Coco Riba Caya.

“Cu e sistema nobo y innovativo aki nos ta invita famianan, dos adulto hunto cu maximo tres mucha, pa particia den e evento aki. Kibra Coco Riba Caya ta bay ta estilo di un scavenger hunt car rally caminda bo ta participa pa gana premio como famia of grupo. E evento aki lo tuma luga diadomingo awo y lo cuminsa pa 10or di mainta,” el a bisa.

Segun el a informa, e idea tras di e actividad aki ta cu e grupo of famia lo ricibi diferente tarea, nan mester bay na e sitionan historico cu Betico Croes a yega di bishita, caminda actonan historico a tuma luga y via un QR code cu ta scan cu un telefon nan lo haya instruccion, pregunta etc pa completa e tarea.

E reglanan pa participa ta simple, mester crea un grupo of famia cu dos adulto y maximo tres mucha den un auto pa por participa. Durante e actividad lo cubri gran parti di Aruba y ta bay tin premio pa e grupo campeon, pa e grupo miho uniforma, como tambe pa e auto mas bunita decora.

Via medionan di comunicacion tambe por ta pendiente pa loke ta trata e pistanan pa yega na e sitionan pa por haci e tareanan.

“Diadomingo awo nos ta pidi un y tur pa participa, keda pendiente pa e informacionnan cu nos ta bay duna. Nos kier pa e pueblo sali y diverti, nos kier motiva y tambe conscientisa pa haciele den ambiente familiar, pero tambe amplia nos conocemento pa loke ta trata nos libertador Betico Croes. Un y tur ta invita pa participa den e evento aki,” Arends a señala.