Manera a wordo anuncia par di luna pasa, awe 1 di october ta cuminsa Censo 2020 di manera online, y lo continua te dia 24 di october.

Ayera durante un conferencia di prensa di Central Bureau of Statistics Aruba (CBS), su director suplente Desiree Helder a informa cu tur hende lo por haya acceso na e cuestionario via online a traves di nan website www.census2020.aw (of scan e QR-code adhunto).

El a menciona cu Censo 2020 ta parti den diferente etapa pa motibo di pandemia di Covid-19. Normalmente un censo ta trata di un conteo cu ta haci di cas pa cas, na unda mester bishita e hogarnan na Aruba, pero cu e situacion aki nan a dicidi di hacie di otro manera, cu ta online.

Helder a señala cu ta berdad cu esaki tin su reto, pa motibo cu no tur hende tin internet of no tin un aparato, pero tambe lo duna oportunidad pa esunnan cu no por hacie di e manera aki.

CBS tambe lo tin disponibel un hardesk pa por yuda personanan cu tin pregunta riba e censo mes. E hardesk aki ta wordo yena door di nan mesun colaborado cu nan tin encarga pa tuma tur yamada, e-mail y tambe mensahenan di e plataforma WhatsApp di esunnan cu por tin pregunta riba con por yena e cuestionario, pakico tin cu yena e cuestionario of otro duda cu por tin.

“Nos meta ta pa mas tanto hogar posibel por yena e cuestionario online, pa despues si mester nos bishita otronan na cas”, Helder a sigura.

Nan ta bay ta disponibel desde 8or di mainta te cu 8or di anochi na e number di telefon 524.7444 y via e-mail census2020@cbs.aw; cu di e manera aki el a sigura cu nan ta cla pa tuma tur pregunta cu e hogarnan tin, pa yuda e hendenan pa yena e cuestionario manera mester ta.

Otro fase lo cuminsa di 11 te cu 24 di october, na unda esunnan cu no por a yena e cuestionario, CBS lo recorda nan pa haci esey via online. Pero tambe pa por entrevista nan via telefon si ta necesario.

Ta importante destaca cu pa personanan por yena e cuestionario, nan mester tin den man e number di parcela di awa di WEB. Esunnan cu no tin un number di parcela, pa motibo cu por ehemplo e personanan ta biba den apartamento cu no tin nan mesun meter di awa, nan por yama CBS na e number anteriormente menciona, y asina por haya un codigo unico pa por tin e acceso na e cuestionario.

“Niun hende lo mester haya problema pa yena e cuestionario aki”, Helder a enfatisa.

Despues di 24 di october lo tuma aproximadamente un siman pa nan por haya un bista completo di tur esunnan cu a yena e cuestionario online y desde 1 di november nan lo bishita e hogarnan cu ainda no a logra pa hacie via online cu tur e recomendacion di Departamento di Salud Publico (DVG).

E tempo di cuestionario ta wordo calcula entre 10 minuut pa cada persona. “E ta un tempo cu ta valioso, pasobra no ta simplemente un cuestionario. Ta trata di un conteo general di nos poblacion”, Helder a afirma.

Diferente topiconan ta wordo tuma na cuenta, por ehemplo, educacion, salud, vivienda, composicion di hogar, labor; cu tin preguntanan sumamente importante, segun el a expresa, pa e situacion actual.

Censo 2020 a causa controversia vooral den temporada di pandemia, unda hopi hende ta puntra pakico lo mester hacie den tempo aki. Helder a comenta cu nan no por planifica ni maneha un pais si no tin datonan actual, y den e periodo aki, cada biaha nan ta mas consciente di con valioso e informacion ta y cu esaki por wordo usa pa planifica di awor pa futuro.

“P’esey mes nos ta pidi full cooperacion di comunidad di Aruba pa participa den esaki, pasobra awor mas cu nunca e ta importante pa nos tin un conteo completo”, el a declara.

Di su parti, Damara Rasmijn, PR di comunicacion, a splica cu riba e website di CBS menciona, tambe e personanan por haya mas informacion di tur e tema cu nan ta puntra durante un censo y pakico nan ta puntra nan.

Un parti importante ta con por participa. Rasmijn a bisa cu nan a traha un checklist den 4 idioma, Ingles, Spaño, Hulandes y Papiamento, como tambe un checklist di cada tema, pa hende haya sa kico ta e preguntanan y ki informacion nan por prepara.

“E situacion ideal ta cu tur persona lo sinta hunto pa asina yena e cuestionario aki” el a sigura.

Pa finalisa, nan a anuncia cu na fin di e cuestionario e personanan lo haya e pregunta si nan hogar lo kier coopera cu encuestanan continuo. Esaki ta nifica cu nan lo kier haci varios encuesta despues di Censo, riba diferente tema pa keda haya informacion di comunidad. Esaki lo tuma luga mas tanto online y riba telefon, ora e persona lo ta dispuesto pa duna su number di telefon pa CBS lo manda un link via e-mail pa un cuestionario.