Recientemente, Oficina Central di Estadistica a publica su Indice di Prijs di Consumidor (CPI) pa luna di februari 2025. Den esaki a nota cu utilidad, gasolin y diesel como grupo a mira un aumento di prijs di 1.1 porciento.
Cambio di prijs di petroleo, utilidad, gasolin y diesel na Februari 2025
Prijs di utilidad (electricidad y awa), gasolin y diesel ta wordo determina primordialmente door di e prijs internacional di petroleo.
Na Februari 2025 e prijs promedio pa bari di petroleo (US$ 71.56) a conoce un caida di US$ 3.76 (-5.0%) compara cu Januari 2025 (US$ 75.32).
Prijs di electricidad y di awa no a cambia compara cu Januari 2025. Consecuentemente, e prijs promedio di electricidad pa vivienda a keda Afl. 263.67, mientras cu e prijs promedio di awa pa vivienda a keda Afl. 168.73.
Prijs di gasolin a registra un subida di Afl. 8.20 cen (3.5%) na Februari 2025 y a causa un efecto di 0.16 ppt riba e CPI.
Prijs di diesel a registra un subida di Afl. 13.30 cen (6.5%) na Februari 2025 y a causa un efecto di 0.02 ppt riba e CPI.
Na Februari 2025, utilidad, gasolin y diesel como grupo, tabatin un subida den prijs di 1.1% compara cu Januari 2025 y hunto tabatin un influencia di 0.18 ppt riba e CPI, mientras cu e restante 404 bienes y servicio hunto, a conoce un subida di prijs di 0.3% y tabatin un efecto di 0.23 ppt riba e CPI.
