CBS lo conscientisa mas riba importancia di colecta informacion anonimo; 9% di hogar a nenga participa cu Censo Piloto

Oficina Central di Estadistica (CBS) a ehecuta nan Censo Piloto den tempo record, danki na medionan digital. 9% di hogarnan cu a bay encuesta a nenga di participa, y pa e rason aki CBS kier conscientisa riba e importancia di tin un Censo di Poblacion y Vivienda (Censo Aruba 2020) mas completo cu ta posibel, cu cooperacion di comunidad.

Durante un conferencia di prensa unda e oficina di estadistica a comparti resultadonan preliminar cu prensa, Hefe di Estadistica Social Demografico Desiree Helder a amplia riba e retonan cu CBS ta enfrenta pa pueblo compronde con importante colecciona data ta pa gobierno y otro institucionnan publico por formula maneho corecto pero alabes pa por mira desaroyo di un pueblo den transcurso di tempo.

Asina por a mira cu 9% di hogar cu a bishita a nenga di participa, mientras 11% no tabata presente, mirando cu mayoria ta bay vakantie, y finalmente 77% si a participa. Helder a menciona cu mirando e resultadonan aki CBS lo bay enfoca hopi mas riba campaña di informacion y conscientisacion pa pueblo por compronde dicon ta importante pa coopera cu CBS durante e Censo. E plan tambe ta pa duna hopi mas informacion riba kico e preguntanan cu ta haci durante e Censo ta, dicon nan ta importante y con ta uza e contestanan. ‘E campaña di publicidad lo bay ta extenso, e lo bay zorg pa esunnan cu no a coopera e biaha aki si coopera otro aña’, Helder a splica.

Un motibo cu lo por duna pa no participa cu e Censo, ta cu ta posibel cu cierto parti di pueblo lo tin miedo cu CBS lo por bay comparti cierto informacion cu otro departamentonan, manera departamento di impuesto, cu e ora ey lo por bay tuma accion a base di informacion cu a haya den e Censo. Esaki ta algo cu Helder ta reconoce den e ultimo Censo aki, y pa tal rason a duna encuestadonan training specifico pa asina indica cu esaki ‘no mester ta un miedo’. Esaki ta pasobra CBS ta mara na secresia.

CBS ta mara na Statistiekverordening pa mantene secresia.
“Tur locual e persona mes contesta nos, ta keda cerca nos. Ningun instancia, sea gobierno of pafo di gobierno, ta haya e datonan aki. Den sentido cu nos por haci un analisis di dato pa indica na nan cuanto hende ta traha y cuanto hende ta biba di cierto entrada, pero nunca nan ta haya sa cu [por ehempel] Maria Werleman cu ta biba na Pavia 120 ta esun cu ta haya 3 mil florin pa luna […] Ningun instancia ta haya sa detaye personal, pasobra e estadistica cu nos ta publica ta di forma agrega”, Helder a splica.

E ley principal cu ta mara CBS na secresia ta e Statistiekverordening. “Nos tur como ambtenaar ta mara na e ley ey, pero tambe tur encuestado den nan contract nos ta mara nan na e ley tambe”, Helder a splica. “Kier men si algo sali afo no solamente CBS ta aansprakelijk (responsabel) si no tambe e encuestado.”

No ta colecciona informacion riba status legal.
Bon Dia a puntra riba con ta purba percura cu tur persona, sin distincion si nan tin status legal riba e isla, por participa cu e encuesta di Censo. Esaki specialmente pasobra e grupo aki normalmente tin poco miedo pa cualkier autoridad cu mester yega nan hogar. Helder a indica cu e encuesta na ningun momento tin pregunta relaciona cu e status legal di un persona, pues esaki no ta informacion cu ta colecciona. “E Censo ta un conteo completo di tur hende cu ta biba na Aruba y nan tambe ta biba na Aruba, nan tambe ta comparti den sociedad y nan tambe mester wordo conta”.