Oficina Central di Estadistica ta presenta e resultadonan principal di e Indice di Prijs di Consumo (CPI) pa luna di October 2023. Pa loke ta e indice di cuminda y servicio di catering, esaki a registra un aumento di 0.1%.
E indice di “Cuminda & servicio di catering” a registra un subida di 0.1% na October 2023, despues di un subida di 0.6% na September 2023.
E indice di “Cuminda na cas” (0.2%) a registra un subida, unda ocho (8) di e diesun (11) indicenan di e gruponan di cuminda na cas a subi na October 2023. E indice di “Berdura” a conoce e subida di mas grandi (0.9%) na October 2023. E indicenan di “Pan y otro productonan di grano” (0.7%), “Fruta” (0.6%) y “Sucu, jam y otro tipo di cos dushi” (0.4%) tambe a registra subida.
E caida mas grandi a wordo registra den e indice di “Batata, yuca y batata dushi” (-2.2%) na October 2023.
E indice di “Cuminda pafo di cas” a registra un caida leve di 0.01% cambio na October 2023.
Na October 2023, “Cuminda na cas” y “Cuminda pafo di cas” como grupo, tabatin un subida di prijs di 0.1% compara cu September 2023 y hunto tabatin un influencia di 0.02 ppt riba e CPI, mientras cu e restante bienes y servicio hunto a experencia un subida di prijs di 0.1% y tabatin un efecto di 0.11 ppt riba e CPI.
