Recientemente, Bureau Central di Estadistica (CBS) a publica su Indice di Prijs di Consumo (CPI). Den esaki, a destaca aumento den bestaansminimum y cuminda & servicio di catering.

Bestaansminimum

E bestaansminimum ta e nivel minimo di entrada cual ta wordo percibi cu ta necesario pa logra mantene un nivel di bida adecuado den un cierto pais. Usualmente e bestaansminimum ta wordo determina door di calcula e gasto di tur e recursonan esencial cu un adulto ta consumi den un luna of aña. Generalmente esaki ta wordo yama un indice basico di necesidad, y e ta varia segun e prijs di cuminda, paña, vivienda, transporte y otro articulonan den e “canasta”.

Escalanan di ekivalencia ta wordo usa pa ahusta e nivel minimo di entrada percibi pa hogarnan di diferente tamaño y composicion. E escala ta asigna un peso di 1.0 pa e prome adulto y 0.5 pa cada adulto adicional den e hogar (edad 16+) y un peso di 0.3 pa cada mucha (edad 0- 15 aña). E bestaansminimum ta basa riba cifranan di e rapport “Bestaansminimum 2010” y ta wordo actualisa mensualmente pa cu inflacion usando e CPI mensual. E unidad di referencia den e rapport aki ta di un hogar cu ta consisti di dos (2) adulto y dos (2) mucha (edad 0-15 aña).

Na October 2024 e bestaansminimum mensual pa un hogar cu ta consisti di dos (2) adulto y dos (2) mucha (edad 0-15 aña) (Afl. 5,520) ta mustra un aumento di Afl. 88 compara cu October 2023 (Afl. 5,432) y a wordo causa principalmente door di aumentonan di respectivamente, Afl. 56 y Afl. 19 den e sectornan di “Cuminda y bebida no-alcoholico” y “Paña y sapato”. E unico cada na October 2024 a wordo registra den e sector di “Transporte” (Afl. -15).

Na October 2024 e bestaansminimum mensual pa un hogar cu ta consisti di un solo adulto ta Afl. 2,629, cual ta representa un deficit di entrada di Afl 643, un caida di Afl. 51 compara cu e deficit observa un aña pasa (Afl. 694). E deficit aki ta e di tres mas halto registra den un periodo di seis (6) aña pa luna di October.

Cambio di prijs di petroleo, utilidad, gasolin y diesel na October 2024

Prijs di utilidad (electricidad y awa), gasolin y diesel ta wordo determina primordialmente door di e prijs internacional di petroleo. Na October 2024 e prijs promedio pa bari di petroleo (US$ 72.48) a conoce un aumento di US$ 2.18 (3.1%) compara cu September 2024 (US$ 70.30).

Prijs di electricidad y di awa no a cambia compara cu September 2024. Consecuentemente, e prijs promedio di electricidad pa vivienda a keda Afl. 274.57, mientras cu e prijs promedio di awa pa vivienda a keda Afl. 168.73.

Prijs di gasolin a registra un caida di Afl. 16.30 cent (-6.5%) na October 2024 y a causa un efecto di -0.31 ppt riba e CPI. Prijs di diesel a registra un caida di Afl. 8.80 cent (-4.2%) na October 2024 y a causa un efecto di -0.01 ppt riba e CPI.

Na October 2024, utilidad, gasolin y diesel como grupo, tabatin un caida di prijs di 1.9% compara cu September 2024 y hunto tabatin un influencia di -0.32 ppt riba e CPI, mientras cu e restante 404 bienes y servicio hunto, a conoce un caida di prijs di 0.04% y tabatin efecto un efecto di -0.04 ppt riba e CPI.

Cambio di prijs di Cuminda y servicio di catering na October 2024

E indice di “Cuminda & servicio di catering” a registra un aumento di 0.1% na October 2024, despues di a registra un aumento di 0.3% na September 2024. E indice di “Cuminda na cas” (0.1%) a registra un aumento, unda shete (7) di e diesun (11) indicenan di e gruponan di cuminda na cas a subi na October 2024.

E indice di “Berdura” a conoce e aumento di mas grandi (2.0%) na October 2024. Otro aumentonan significante a wordo registra den e indicenan di “Fruta” (1.2%), “Pisca y otro cuminda di lama” (1.1%) y “Azeta y otro productonan traha di vet” (0.5%). E caidanan mas grandi a wordo registra den e indicenan di “Lechi, keshi y webo” (-0.4%) y “Pan y otro productonan di grano” (-0.4%) na October 2024.

E indice di “Cuminda pafo di cas” a registra un aumento di 0.1% na October 2024.

Na October 2024, “Cuminda na cas” y “Cuminda pafo di cas” como grupo, tabatin un aumento di prijs di 0.1% compara cu September 2024 y hunto tabatin un influencia di 0.02 ppt riba e CPI, mientras cu e restante bienes y servicio hunto a experencia un caida di prijs di 0.5% y tabatin un efecto di -0.38 ppt riba e CPI.