Ayera, Oficina Central di Estadistica a publica su Indice di Prijs di Consumo (CPI) pa e periodo Januari 2024 – Januari 2025. Notablemente, segun e CPI, den ultimo 12 luna, seis di 12 sector a registra aumento di prijs.

Indice di Prijs di Consumo

Den e ultimo diesdos (12) luna, e CPI a subi cu 0.3%, unda seis (6) di e diesdos (12) sectornan a registra aumento di prijs.

E aumentonan cu tabatin e mayor efecto riba e CPI a wordo registra pa e sectornan di “Transporte” (4.6%), “Restante bienes y servicio” (1.1%), “Restaurant y hotel” (2.6%), “Cuminda y bebida no-alcoholico” (0.7%) y “Salud” (3.7%), causando un efecto di respectivamente, 0.56, 0.13, 0.13, 0,08 y 0,08 ppt.

E aumento den e sector restante a contribui cu un efecto di 0.03 ppt riba e CPI di Januari 2024 – Januari 2025.

E aumentonan aki a wordo contraresta parcialmente door di principalmente un reduccion den e indice di e sector di “Recreacion y cultura” (-5.5%), cu a contribui cu un efecto di -0.51 ppt.

E reduccion den e sectornan restante a contribui cu un efecto di -0.20 ppt riba e CPI di Januari 2024 – Januari 2025.

E aumento den e sector di “Transporte” a wordo causa principalmente door di un aumento di 10.5% den e categoria “Compra di vehiculo”, causando un efecto di 0.42 ppt.

E aumento den e sector di “Restante bienes y servicio” a wordo causa door di un aumento den e categoria “Otro articulonan personal” (13.5%), causando un efecto di 0.15.

E aumento den e sector di “Restaurant y hotel” a wordo causa principalmente door di un aumento di 2.6% den e categoria “Cuminda pafo di cas”, causando un efecto di 0.13 ppt.

E aumento den e sector di “Cuminda y bebida no-alcoholico” a wordo causa principalmente door di un aumento den e categoria “Cuminda” (0.6%), causando un efecto di 0.06 ppt.

E aumento den e sector di “Salud” a wordo causa principalmente door di un aumento den e categoria “Producto, aparatonan y ekipo medico” (5.3%), causando un efecto di 0.07.

E reduccion den e sector di “Recreacion y cultura” a wordo causa principalmente door di un reduccion di 17.1% den e categoria “Vacacion”, causando un efecto di -0.44 ppt.

Canasta di consumo

Den e ultimo aña cu a pasa 48.8% di productonan den e canasta di consumo di e CPI a conoce un aumento di prijs causando un efecto di 2.27 ppt, mientras cu 41.4% ta mustra un reduccion di prijs, cu a contribui cu un efecto di -1.96 ppt y pa e restante 9.8% no tabatin cambio den prijs.

E indicenan di “Bienes” (0.1%) y “Servicionan” (0.6%) a registra aumentonan, causando un efecto di respectivamente, 0.06 y 0.25 ppt.

Bestaansminimum

Den e ultimo diesdos (12) luna e bestaansminimum pa un hogar consistiendo di dos (2) adulto y dos (2) mucha (edad 0-15 aña) a registra un aumento di Afl. 18, di Afl. 5,462 na Januari 2024 pa Afl. 5,480 na Januari 2025. E aumento aki a wordo causa principalmente door di aumentonan den e sector di “Cuminda y

bebida no-alcoholico” (Afl. 16) y “Transporte” (Afl. 14).

Cambio di prijs di petroleo, utilidad, gasolin y diesel

E prijs promedio pa bari di petroleo a conoce un aumento di US$ 1.76 (2.4%) di US$ 73.56 na Januari 2024 pa US$ 75.32 na Januari 2025.

E indice di Energia a baha cu 1.9% den e ultimo aña y a causa un efecto di -0.31 ppt.

E indice di “Gasolin” (0.3%) a registra aumento, mientras cu e indice di “Diesel” a registra un reduccion di 4.1%, causando un efecto di respectivamente, 0.01 y -0.01 ppt riba e CPI.

E indice di “Electricidad” a registra un reduccion di 4.0%, causando un efecto di -0.31 ppt, mientras cu e indice di “Awa” no a registra cambio.

E restante 404 bienes y servicio hunto, a conoce un aumento di 0.7% y tabatin hunto un efecto di 0.62 ppt.

Cambio di prijs di Cuminda y servicio di catering

Den e ultimo diesdos (12) luna e indice di “Cuminda & servicio di catering” a subi cu 1.3%.

E indice di “Cuminda na cas” a conoce un aumento di 0.7%, unda seis (6) di e diesun (11) indicenan di e gruponan di “Cuminda na cas” a subi durante e periodo aki.

E indice di “Restante productonan pa alimentacion” a conoce un aumento di 2.1%, e aumento mas grandi entre e gruponan di “Cuminda na cas”. Ademas, otro aumentonan significante a wordo registra den e indicenan di “Carni” (1.9%), “Pan y otro productonan di grano” (1.7%), “Bebida no-alcoholico” (1.6%) y “Lechi, keshi y webo” (1.1%).

E reduccion mas grandi durante e periodo aki a wordo registra den e indice di “Fruta” (-2.8%).

E indice di “Cuminda pafo di cas” a registra un aumento di 2.6% den e ultimo diesdos (12) luna.

Den e ultimo diesdos (12) luna, “Cuminda na cas” y “Cuminda pafo di cas” como grupo, tabatin un aumento di prijs di 1.3% y hunto tabatin un influencia di 0.21 ppt riba e CPI, mientras cu e restante bienes y servicio hunto a experencia un aumento di prijs di 0.1% y tabatin un efecto di 0.10 ppt riba e CPI.