Ayera mainta durante un conferencia di prensa, Damara Rasmijn di Central Bureau of Statistics Aruba (CBS) a informa cu en conexion cu celebracion di Dia Internacional di Hende Muhe dia 8 di maart, CBS ta realisando un encuesta ariba inclusion di hende muhe na Aruba.

Rasmijn a splica cu como normalmente internacionalmente nan ta saca un tema cada aña, CBS semper ta purba di traha un grafico cu informacion a base di data cu nan tin normalmente di hende muhe. Tipo di informacion cu nan ta publica ta entre informacion di edad, pais di nacemento, nacionalidad, si e hende muhe ta emplea, si nan tin yiu, cuanto yiu nan tin etc.

Pa e aña aki e tema pa celebracion di Dia Internacional di Hende Muhe ta inspira inclusion. Rasmijn a indica cu pa esaki CBS no tin data, pero el a remarca cu e ta un tema cu nan ta haya normalmente hopi pregunta ariba dje, kico e inclusion ta di hende muhe den comunidad.

El a sigui splica cu pa e biaha aki nan a opta pa no tuma data solamente di por ehemplo cuanto hende muhe tin na Aruba, pero nan ta bay haci un encuesta pa asina haya mas data di e parti di inclusion di hende muhe den e poblacion.

E encuesta ta dividi den dos parti. E prome parti ta caracteristicanan general di e persona cu ta contesta e pregunta, por ehemplo edad, si e persona ta emplea, pais di nacemento, etc., pues preguntanan normal cu ta haci den un encuesta.

E di dos parti di e encuesta ta e ponencianan di con e comunidad di Aruba ta wak cu e hende muhe ta inclui den e poblacion di Aruba. Den e parti aki Rasmijn a splica cu por pensa riba topiconan manera por ehemplo den educacion, deporte, arte y den parti di labor mes.

“Esey ta nos meta pa e encuesta aki. E meta ta pa haya un bista di con nos percepcion, e percepcion di hende muhe ta den diferente topico. No precisamente bo mester tin conocemento di un topico, pero kico un persona mes ta wak den comunidad con bo ta haya cu e prestacion di hende muhe ta den cierto topiconan,” Rasmijn a indica.

El a splica cu como cu nan kier publica e resultadonan di e encuesta di biaha pa dia 8 di maart, e encuesta a cuminsa oficialmente ayera y ta termina dia 1 di maart. E encuesta ta completamente online y e link lo ta disponibel ariba e website di CBS como tambe nan pagina di Facebook unda cu tur hende por yega y yena e encuesta aki.

E encuesta ta habri pa tur hende na Aruba, tanto hende muhe como hende homber, y e unico rekisito cu tin ta cu e persona cu kier participa y yena e encuesta mester ta riba 15 aña di edad.

Rasmijn a remarca cu hende homber tambe por participa y e meta di e participacion di hende homber ta pa wak ki nan percepcion ta di con hende muhe ta contribui na e comunidad di Aruba.

El a agrega cu nan ta bay haci un parti di e percepcion di hende muhe mes, con nan ta wak con nan ta contribui na comunidad, pero tambe e percepcion di con e hende homber ta haya cu hende muhe ta contribui na e comunidad di Aruba.

E resultado di e encuesta, Rasmijn a splica, ta pa CBS mes pa nan tin data ariba e tema aki. El a indica cu semper ora cu tin diferente tema di Nacionnan Uni di dianan internacional, CBS ta purba tin data nobo y p’esey CBS a opta pa realisa e encuesta aki.

El a menciona cu manera tur data na CBS, e informacion no ta solamente pa nan, pero tambe pa tur esnan cu kier e data aki. El a agrega cu ariba e tema aki di inclusion di hende muhe tin hopi pregunta tambe y no tin data actualmente.

Pa loke ta e encuesta mes, Rasmijn a indica cu e ta un encuesta a hopi facil ya cu e no ta un encuesta cu normalmente CBS ta haci, y ademas e ta mas cortico cu e otro encuestanan tradicional tambe. E persona cu kier yena e encuesta mester solamente click riba link, scoge di e cuater idiomanan pa haci e encuesta y yena e preguntanan. E preguntanan ta cuminsa na e sexo di e persona y di eynan e ta sigui, y nan ta 15 pregunta mas o menos.

Rasmijn a resalta cu normalmente CBS ta purba haci encuesta den diferente otro topico y den e caso aki pa dia di hende muhe nan a scoge pa haci algo otro y wak con e ta bay pasobra e ta un topico cu normalmente nan no ta haci encuesta di dje y asina nan por wak tambe kico e respuesta ta.

El a agrega cu riba e topico specifico aki nan no tin data cu por compara cune, esaki ta un topico completamente nobo. Loke si tin data riba dje cu ta relaciona cu hende muhe ta e cantidad di hende muhe cu tin na Aruba y unda nan ta traha. Aworaki CBS ta bay agrega e data aki cu ta algo completamente nobo.

Por ultimo el a remarca cu e encuesta aki no ta hinca den e planning pa e aña aki pa haci un encuesta manera normalmente CBS ta haci, p’esey a opta pa haciele online y asina tin un indicacion y base di informacion riba esaki pa asina si despues mester haci un investigacion mas grandi, por haci esey pasobra ya tin un base caba.