Pa Aruba e calculo di e indice ta mustra – Aruba Multidimensional Poverty Index (AMPI) – tin 15.9 % di nos hogarnan ta wordo considera di ta pober. Esaki ta ekivalente na 5.105 hogar, consistiendo di 13.638 persona cu ta biba den e hogarnan aki, asina e oficina di estadistica CBS ta informa.

San Nicolas mas pober
E analisis ta mustra cu e AMPI pa San Nicolas, specialmente San Nicolas zuid tin un proporcion mas grandi di hogarnan cu ta biba den pobresa. “Asina mes, na momento di combina e cantidad di hogar pober cu e intensidad di deprivacion experencia, e area di Noord/ Tanki Leendert ta score mas halto. San Nicolas ta score halto tambe pa loke ta trata e cantidad di hogarnan cu ta den posicion vulnerabel pa cay den pobresa”, segun CBS.

Mayoria di e hogarnan den pobresa ta trata di hogarnan di sea 1 of 2 persona. Esunnan di 1 persona ta mas tanto un persona economicamente no-activo (por ehempel pensiona) di un edad averahe di 68 aña. Unda ta trata di un hogar di 2 persona, por lo menos un di e personanan ta economicamente no-activo y cu un edad averahe di 65 aña).

Hogarnan cu ta experencia pobresa y tin mucha ta representa 30 porciento di tur hogar den pobresa. Aki ta trata di 2.931 mucha cu mayornan relativamente jong cu ta experencia pobresa. Den nan relato nan ta splica con nan ta yega na e cifra di pobresa aki. Pa haci nan analisis nan ta wak ‘entrada abao, 5 dimension y con a midi areanan vulnerabel’.

Areanan vulnerabel
Segun e indice, di analisis di CBS, 6.144 hogar ta den posicion vulnerabel pa cay den pobresa y di esunnan cu ta wordo considera AMPI pober, 1.437 hogar ta experencia pobresa severo. Ademas e hogarnan por wordo categorisa di esunnan vulnerabel pa cay den pobresa, esunnan den pobresa modera y esunnan den pobresa severo cu entrada abao, e relato di CBS ta sigui.

“Entrada solamente no ta suficiente pa por determina e estado di ta vulnerabel di un persona of hogar of ta indica cu e persona of hogar en cuestion ta vulnerabel of ta den un estado di desbentaha. Un simpel ehempel ta cu aunke e habilidad di gasta di un persona of hogar ta depende di su entrada.”

Entrada abao
CBS ta pone enfasis riba esunnan cu ta biba di un entrada relativamente abao y cu ta experencia nivelnan relativamente halto di deprivacion. Aki nan a haci un analisis cu e datonan di e Censo 2010, uzando e Global Multi-dimensional Poverty Index (Global MPI) cu United Nations Development Programme (UNDP) ta calcula y uza door di United Nations Development Programme (UNDP).

5 dimension y con a midi
E Indice Multi-dimensional di pobresa ta consisti di 5 dimension y cada dimension ta parti den diferente indicadornan. E 5 dimensionnan ta inclui: educacion, actividad economico, salud, calidad di bida y entrada. A base di e 5 dimensionnan aki CBS a haci un calculacion door di midi e siguiente aspecto pa e topico pobresa. Teniendo na cuenta cu e midimento e aspectonan ta mustra lo siguiente cu pobresa a wordo midi:

 

  • Bestaansminimum

Pobresa por wordo midi den diferente forma. Por uza por ehempel e sistema di nivel di subsistencia (bestaansminimum). E subsistencia minimo ta wordo defini como e nivel di bienestar (of entrada) cu ta provee solamente e necesidadnan basico di subsistencia. Na 2010, CBS conhuntamente cu Departamento di Salud Publico (DESPA), FCCA, Departamento di Asuntonan Economico, Comercio y Industria y Departamento di Asuntonan Social, a actualisa e nivel di subsistencia pa Aruba segun e metodo internacional ya uza na 1994. A calcula e nivel di subsistencia na 2010 na AWG. 1.985 pa luna pa un hogar di 1 persona.

 

  • Concepto Standard Europeo

Un otro manera pa midi nivel di pobresa ta di acuerdo cu e concepto standard Europeo di pobresa relativo. Esaki ta tuma na consideracion e proporcion di hogarnan cu tin un entrada ekivalente na 60 porciento di e entrada mensual mediano nacional. A base di e datonan di e Censo 2010, CBS a calcula esaki na AWG1.356 pa luna pa un hogar di 1 persona.