CBS (Oficina Central di Estadistica) ta informa cu tin un encuesta pendiente pa 2022 cual ta encuesta di mucha y hoben. Esaki ta cuminsa dia 14 di October y e biaha aki ta buscando encuestador atrobe, pues ta bayendo riba caya back.
Den e caso aki e encuesta aki lo enfoca riba mucha y hoben. CBS a ripara cu ultimo tempo tabatin hopi necesidad di data pa loke ta trata mucha y hoben. E encuesta ta encera diferente tema riba informacion di muchanan, e parti di educacion pa hobennan cu ta traha, relacion cu mayor, y varios punto mas den un encuesta basta amplio unda CBS kier a inclui diferente tema of topico di interes pa data aworaki.
Den CENSO bo ta haya pregunta di mucha pero mas general, pero no tur e temanan cu CBS lo tin cual no ta usual pa pone den CENSO, esaki ta realmente temanan cu a warda pa inclui tur.
Esaki lo encera di edad 0 te cu 24 aña, y depende e edad cierto pregunta lo wordo haci, manera esunnan cu ta 14+ lo haya preguntanan di labor por ehempel.
Buscando encuestador pa haci encuesta exitoso
CBS ta buscando encuestador part-time pa e encuesta di mucha y hoben 2022 cu proposito di haya miho bista di diferente tema di importancia relaciona cu nos muchanan y hobennan. Lo toca temanan manera actividadnan di mucha y hoben den nan tempoliber, participacion riba mercado laboral, bista riba nan futuro y mas. Pa esaki ta exitoso, CBS ta buscando personanan cu lo desea di fungi como encuestador part-time.
Mirando cu e encuesta ta dirigi riba mucha y hoben, e entrevistanan mester wordo haci primordialmente durante oranan di atardi y anochi entre 4or di atardi pa 8or di anochi. Por subi riba e pagina di Facebook di Central Bureau of Statistics Aruba y asina wak kico ta rekisitonan cu mester como un encuestador.
Tur persona cu cumpli cu e rekisitonan menciona por solicita pa ta un encuestador, tanten cu nan ta disponibel durante e periodo menciona. Pa solicita of pa mas informacion por yama libremente riba 524-7417 of por manda un e-mail na ykelly@cbs.aw pa un formulario digital pa yena via e-mail.
