Siman aki, Oficina Central di Estadistica a publica e Indice di Prijs di Consumo (CPI) pa luna di mei ultimo. Den esaki a destaca un aumento den e indice di ‘cuminda y servicio di catering’.
E indice di “Cuminda & servicio di catering” a registra un subida di 0.2% na Mei 2021, despues di un subida di 0.3% na April 2021. E indice di “Cuminda na cas” (0.1%) a registra un subida, unda seis (6) di e diesun (11) indicenan di e gruponan di cuminda na cas a subi na Mei 2021. E indice di “Batata, yuca y batata dushi” a conoce e subida di mas grandi (6.1%) na Mei 2021. E indicenan di “Berdura” (0.8%), “Fruta” (0.6%), “Carni” (0.6%) y “Bebida no-alcoholico” (0.2%) tambe a registra subida.
E indice di “Pisca y otro cuminda di lama” (-0.7%) a registra e caida di mas grandi na Mei 2021. Ademas, caidanan di -0.6% y -0.5% a wordo registra den e indicenan di “Pan y otro productonan di grano” y “Lechi, keshi y webo”, respectivamente.
Den e ultimo diesdos (12) lunanan e indice di “Cuminda & servicio di catering” a baha cu 0.9%. E indice di “Cuminda na cas” a conoce un caida di 1.5%. E indice di “Berdura” a baha cu 9.3%, e caida di mas grandi entre e gruponan di cuminda na cas, mientras cu e indice di “Sucu, jam y otro tipo di cos dushi” a subi cu 1.2%, e subida di mas grandi entre e gruponan di cuminda na cas.
E indice di “Cuminda pafo di cas” a subi cu 0.2% na Mei 2021 y a registra un subida di 0.6% den e ultimo diesdos (12) lunanan.
Na Mei 2021, “Cuminda na cas” y “Cuminda pafo di cas” como grupo, tawata tin un subida di prijs di 0.2% compara cu April 2021 y hunto tawata tin un influencia di 0.02 ppt riba e CPI, mientras cu e restante bienes y servicio hunto a experencia un caida di prijs di 0.2% y tawata tin un efecto di -0.21 ppt riba e CPI.
