Ayera mainta den conferencia di prensa Jonathan Upegui, director di e departamento di National Accounts di Central Bureau of Statistics Aruba (CBS), a anuncia e Censo Economico 2023 cu lo tuma luga for di 14 di april te cu 30 di juni di e aña aki.
Upegui a splica Censo Economico ta e numeracion completo di tur e entidadnan economico na Aruba y ta pasa riba tur entidad. Esey kiermen si un compania tin diferente branch, tur sucursal, CBS lo pasa den e proceso di encuesta di e Censo Economico na tur e sucursalnan di e mesun compania.
E censo lo ta riba tur compania cu ta haci un actividad economico na Aruba pero e aña aki e censo ta enfoca specialmente riba e sector di agricultura y pa esaki Santa Rosa Aruba a uni na CBS pa asina brinda nan experticio den e sector aki.
E metanan di e censo, Upegui a sigui splica, ta pa entre otro tin un bista riba tur e entidadnan fisico activo riba Aruba y asina por tin un bista tambe di con e economia di Aruba ta structura. E ta yuda CBS tambe pa actualisa nan registro di negoshi y pa e Departamento di National Accounts mes ta saca e GDP y pa esey mester keda actualisa cu e manualnan di Nacionnan Uni.
El a agrega cu na 2025 nan ta bay saca e manual nobo y e censo economico ta hopi importante den e caso aki pa asina por tin tur e datonan necesario.
E censo ta yuda cu loke ta e suministro y uso. Esey ta pa wak con e economia ta y pa wak cual sectornan ta cumpra cierto producto, cual sector ta bende cierto producto y cierto servicio. E censo economico ta duna CBS e posibilidad tambe pa duna data y estadisticanan na entidadnan internacional, como por ehempel World Bank y IMF, entre otro.
Upegui a remarca cu e censo economico ta wordo ehecuta digitalmente y tin diferente encuestador cu lo bishita e entidadnan economico. CBS ta pidi pa e representantenan di e companianan, esunnan cu sa di e finanzas di e compania, pa contesta e encuesta di e censo economica.
CBS a enfatisa cu e datonan di e companianan lo wordo usa solamente pa motibo estadistico. E datonan aki no lo ser publica individualmente, solamente riba forma agrega y e datonan digital no lo wordo comparti cu ningun otro entidad, ni den sector publico ni den sector priva. Solamente e cifranan agrega lo wordo publica y comparti.
Te cu aworaki CBS a haci diferente tarea pa prepara pa e censo economico aki. Upegui a sigui splica cu desde october cu november tabatin diferente miembro di staff di e departamento di National Accounts cu a pasa full rond Aruba pa wak e companianan y a marca nan riba un mapa pa asina CBS por tin un base di cuanto compania tin.
Loke CBS a haci tambe ta den januari tabatin un sesion informativo pa e diferente stakeholders prome cu a anuncia e censo. Nan brinda e stakeholders informacion necesario y alabes CBS tabata kier haya feedback ariba kico nan, como stakeholders, ta haya ta importante pa inclui den e censo economico. Kico comercio kier wak como estadisticanan pa CBS publica y si tabatin feedback CBS a inclui e preguntanan aki tambe den e cuestionario.
No a haci e cuestionario aki den papiamento, e idioma principal, pero e lo ta disponibel tambe den Spaño, Ingles y Hulandes.
Upegui a splica cu e informacion cu ta wordo pidi den e cuestionario ta entre otro informacion general, lo puntra e actividad economico principal cu cada compania ta haci, y tambe tin un di dos actividad economico pa e mesun negoshi.
Ta puntra tambe kico ta e servicio y producto cu cada compania ta ofrece, pero tambe kico ta usa pa produci. Esey, el a indica, ta yuda CBS determina cu precision e GDP di e sectornan miho.
Tambe tin diferente pregunta di empleo den e encuesta manera por ehempel cuanto empleado e negoshi tin, nan salario, pero tambe den averahe cuanto vacatura tin habri y cual ta e vacaturanan mas importante cu mester wordo yena.
E encuesta lo toca tambe ariba algun pregunta di digitalisacion, esakinan ta encera si ta usa rednan social, si ta haci propaganda riba rednan social y tambe si ta bende producto digitalmente, esaki ta inclui via website, via Facebook y hasta si ta haci transaccionnan di banco of si ta haci comercio via whatsapp.
Pa loke ta e encuesta pa e sector di agricultura, Upegui a indica cu e preguntanan ta inclui ki tipo di tereno e agricultor ta usa, pakico ta haci uso di e tereno aki, ki fuente di awa ta usa, e manera con ta pisca, ki tipo di producto ta cultiva, ki tipo di producto ta gara, entre otro. .
El a agrega cu pa fin di maart comienso di april lo tin un checklist riba e website di CBS cu informacion di kico tur e compania mester tin delanta pa haci e encuesta mas eficiente. Tambe pa transparencia lo publica e encuesta riba e website den tur cuater idioma.
Tamara Rasmijn, Communications Officer di CBS, a papia di e necesidad pa encuestado y kico tur mester cumpli cune pa por traha como un encuestado durante e censo economico 2023.
El a splica cu pa e Censo Economico 2023 CBS ta calcula cu mester alrededor di 40 encuestador. E diferencia di e censo aki compara cu e otro encuestanan, Rasmijn a indica, ta cu e encuestador tin cu acerca un negoshi y pues no por bisa cu tin un orario fiho, pasobra esaki ta depende e biaha aki di e companianan cu master wordo acerca y e orario cu e companianan aki ta traha.
Den caso cu un persona kier traha como encuestado, mester cumpli cu algun rekisito. E persona mester sa traha cu electronica ya cu e cuestionario ta completamente digital y pa esaki tin dos training obligatorio cu e encuestadonan mester asisti.
Uno ta pa splica e cuestionario y manera ta custumber CBS ta pasa riba tur pregunta y e diferente contestanan pa e encuestado ta miho prepara. E otro training ta encera e parti digital pa e entrevista por cana mas eficiente.
Algun di e otro reksitisonan pa por traha como encuestador ta cu e persona mester tin su propio transport, mester tin por lo menos 21 aña di edad, mester ta disponibel durante full e periodo di e censo economico, 14 di april pa 30 di juni y e persona mester por domina tur cuater idioma, Papiamento, Ingles, Spaño y Hulandes.
Esnan interesa por manda un email na ec2023@cbs.aw y asina lo ricibi e formulario di aplicacion digital.
