CBS: 59% di producto den canasta di consumo a aumenta di prijs den ultimo aña

Recientemente, Oficina Central di Estadistica (CBS) a publica e CPI pa e periodo October 2022 – October 2023. Den esaki por a nota cu den e ultimo aña cu a pasa 59.1% di productonan den e canasta di consumo di e CPI a conoce un aumento di prijs.

Indice di Prijs di Consumo

Den e ultimo diesdos (12) luna, e CPI a subi cu 1.7%, unda nuebe (9) di e diesdos (12) sectornan a registra aumento di prijs. E aumentonan cu tabatin e mayor efecto riba e CPI a wordo registra pa e sectornan di “Comunicacion” (6.8%), “Cuminda y bebida no-alcoholico” (3.6%), “Restante bienes y servicio” (3.3%), “Vivienda” (1.4%) y “Restaurant y hotel” (7.7%), causando un efecto di respectivamente, 0.53, 0.41, 0.38, 0.37 y 0.35 ppt. E aumentonan den e restante sectornan a contribui cu un efecto di 0.50 ppt riba e CPI di October 2022 – October 2023.

E aumentonan aki a wordo contraresta parcialmente door di principalmente un caida den e indice di e sector di “Recreacion y cultura” (-6.3%), cu a contribui cu un efecto di -0.60 ppt. E caidanan den e restante sectornan a contribui cu un efecto di -0.21 ppt riba e CPI di October 2022 – October 2023.

E aumento den e sector di “Comunicacion” a wordo causa door di un aumento di 7.9% den e categoria “Servicio di telefon y fax”, causando un efecto di 0.59 ppt.

E aumento den e sector di “Cuminda y bebida no-alcoholico” a wordo causa principalmente door di un aumento den e categoria “Cuminda” (3.4%), causando un efecto di 0.34 ppt.

E aumento den e sector di “Restante bienes y servicio” a wordo causa principalmente door di un aumento di 5.4% den e categoria “Cuido personal”, causando un efecto di 0.21 ppt.

E aumento den e sector di “Vivienda” a wordo causa principalmente door di un aumento di 13.8% den e categoria “Mantencion y reparacion di vivienda”, causando un efecto di 0.71 ppt.

E aumento den e sector di “Restaurant y hotel” a wordo causa door di un aumento den e categoria “Cuminda pafo di cas” (8.2%), causando un efecto di 0.37 ppt.

E caida den e sector di “Recreacion y cultura” a wordo causa principalmente door di un caida di 18.2% den e categoria “Vacacion”, causando un efecto di -0.52 ppt.

Canasta di consumo

Den e ultimo aña cu a pasa 59.1% di productonan den e canasta di consumo di e CPI a conoce un aumento di prijs causando un efecto di 5.43 ppt, mientras cu 35.8% ta mustra un caida di prijs, cu a contribui cu un efecto di -3.70 ppt y pa e restante 5.1% no tabatin cambio den prijs. E indice di “Bienes” (0.3%) a registra aumento, causando un efecto di 0.16 ppt, mientras cu e indice di “Servicionan” a registra un aumento di 3.9% y a causa un efecto di 1.58 ppt.

Bestaansminimum

Den e ultimo diesdos (12) lunanan e bestaansminimum pa un hogar consistiendo di dos (2) adulto y dos (2) mucha (edad 0-15 aña) a registra un aumento di Afl. 121, di Afl. 5,311 na October 2022 pa Afl. 5,432 na October 2023. E aumento aki a wordo causa principalmente door di un aumento den e sector di “Cuminda y bebida no-alcoholico” (Afl. 79).

Cambio di prijs di petroleo, utilidad, gasolin y diesel

E prijs promedio pa bari di petroleo a conoce un caida di US$ 1.67 (-1.9%) di US$ 87.61 na October 2022 pa US$ 85.94 na October 2023.

E indice di Energia a baha cu 0.7% den e ultimo aña y a causa un efecto di -0.13 ppt. E indice di “Gasolin” (9.0%) a registra un aumento, causando un efecto di 0.44 ppt, mientras cu e indice di “Diesel” (0.5%) a registra un aumento, causando un efecto insignificante riba e CPI. E indice di “Electricidad” (-6.8%) a registra caida, causando un efecto di -0.57 ppt, mientras cu e indice di “Awa” no a registra cambio. E restante 404 bienes y servicio hunto, a conoce un aumento di 2.3% y tabatin hunto un efecto di 1.86 ppt.

Cambio di prijs di Cuminda y servicio di catering

Den e ultimo diesdos (12) lunanan e indice di “Cuminda & servicio di catering” a subi cu 4.9%. E indice di “Cuminda na cas” a conoce un aumento di 3.6%, unda seis (6) di e diesun (11) indicenan di e gruponan di “Cuminda na cas” a subi durante e periodo aki.

E indice di “Sucu, jam y otro tipo di cos dushi” a conoce un aumento di 14.5%, e aumento mas grandi entre e gruponan di “Cuminda na cas”. Ademas otro aumentonan a wordo registra den e indicenan di “Restante productonan pa alimentacion” (11.5%), “Pan y otro productonan di grano” (8.7%), “Lechi, keshi y webo” (6.3%), “Bebida no-alcoholico” (5.4%) y “Berdura” (1.9%). E caida mas grandi durante e periodo aki a wordo registra den e indice di “Batata, yuca y batata dushi” (-3.5%).

E indice di “Cuminda pafo di cas” a registra un aumento di 8.2% den e ultimo diesdos (12) luna.