CBA a publica su rapport State of the Economy mas recien, cu ta cubri e periodo di prome tres kwartaal di 2024. Den esaki, a nota cu tur indicador di consumo ta registra aumento. Algun indicador ta sobresali, por ehemplo e hecho cu mas hende a cumpra auto nobo, y a consumi mas coriente pa motibo di aumento den temperatura.

Indicadornan relaciona cu consumo ta refleha aumento durante e prome tres kwartaal di 2024. Durante e periodo aki, tur indicador a di consumo a mustra mehoracion compara cu aña pasa. Aumentonan notable tabata den e balor agrega di credito nobo di consumidor (+19.5%), omzetbelasting (+17.1%), y consumo di coriente na cas (+14.8%) (Chart 4).

E expansion largo den credito nobo di consumidor probablemente ta pa motibo di e aumento skerpi den prestamo pa auto, cu a aumenta cu 21.6% durante e mesun periodo. Por splica e aumento aki door di e interes mas halto di consumidor pa cumpra auto nobo, manera indica pa e Encuesta di Confiansa di Consumidor (CCS). E encuesta a mustra cu un proporcion grandi di encuestado a considera adecuado pa cumpra un auto nobo (un averahe di 9.6% YTD 2024 compara cu 7.8% YTD 2023 [Chart 5]). Ademas, e cantidad di benta di auto reporta pa Aruba Car Dealers Association (ACDA) a aumenta cu 15.5% durante e mesun periodo.

E caida den prijs di vehiculo den prome mita di 2024 por a contribui na e aumento den compra di auto.

A pesar di e desaroyonan positivo aki, e balor agrega di credito nobo di consumidor a mustra un reduccion compara cu añanan anterior. Durante e mesun periodo na 2023, credito nobo di consumidor a aumenta cu 27.0% y na 2022 cu 24.0%. Pues mientras credito di consumidor a crece na 2024, su aumento tabata menos cu den añanan anterior.

Omzetbelasting (17.1%) y impuesto riba commodities (+7.9%) colecta pa Gobierno tambe a indica consumo mas halto durante prome tres kwartaal di 2024. Sinembargo, compara cu 2023, ambos componente di impuesto ta mustra un crecemento mas slow. Por atribui e caida den crecemento di omzetbelasting na e aumento di BBO di 6% pa 7% for di 1 di januari 2023, y implementacion di BBO na Frontera 1 di augustus 2023, cu a impulsa omzetbelasting na 2023 compara cu 2022.

E aumento den impuesto riba commodities na 2023 probablemente ta refleha aumento di consumo importa como resultado di reduccion di accijns riba importacion.

Te cu september 2024, datonan di companianan di utilities tambe ta mustra un panorama positivo di consumo. Durante prome tres kwartaal di 2024, consumo di coriente na hogarnan den KwH (+14.8%) y consumo di awa na cas den m3 (+5.3%) a aumenta.
Consumo di coriente na cas a aumenta cu 14.8% despues di aumento di 6.7% na 2023 y 0.9% na 2022. Por atribui e aumento den consumo di coriente na temperaturanan averahe mas cayente (+1.7°F) na Aruba durante prome tres kwartaal di 2024 compara cu e mesun periodo na 2023.
Notablemente, consumo di awa na cas a expande despues di a mustra reduccion den e mesun periodo na 2023 y 2022.

Otro indicadornan relaciona cu consumo tambe ta punta riba consumo mas halto.
Consistente cu añanan anterior, e cantidad di relacion di empleo registra na Banco di Seguro Social (Svb) a continua den tendencia di crecemento. Esaki a aumenta cu 3.6% den prome nuebe luna di 2024 compara cu fin di december 2023. Adicionalmente, e cantidad di transaccion di i-Pago procesa a amplia cu 19.5%, principalmente impulsa pa transaccionnan di Afl.0 te Afl. 250, cu a aumenta cu 25.4%.
Mientras tanto, e crecemento den e cantidad di transaccion riba Afl. 250 a contribui na un grado menor (+13.8%).

Importacion di mercancia, impulsa pa un demanda domestico mas halto den e prospero sector di turismo, tambe a mira un aumento di 9.2%, kedando cerca di e tasa di crecemento di 9.9 porciento na 2023.