Den su publicacion ‘State of the Economy’ mas recien, cubriendo e prome tres kwartaal di 2024, Banco Central di Aruba a informa cu e RER den e di tres kwartaal di 2024 a marca e di cinco kwartaal consecutivo registrando un reduccion.
Den su capitulo tocante Competitividad Internacional, CBA a nota cu fin di september 2024, e tasa di intercambio real (real exchange rate, RER) a contrae na 93.3. Asina, e di tres kwartaal di 2024 ta marca e di cinco kwartaal consecutivo cu a registra un reduccion (Chart 11).
RER a sigui un direccion bay abao desde comienso di e crisis di Covid-19 (es decir, 2020-I).
Den prome dos kwartaal di 2023, RER a crece, pero a reanuda su trayectoria bay abao den e di tres kwartaal di 2023. E tendencia di reduccion di RER ta sugeri cu e posicion di competitividad di Aruba contra e dollar Mericano a mehora desde inicio di pandemia di Covid-19.
Riba un base kwartaal-pa-kwartaal, RER a baha cu 0.1 porciento den e di tres kwartaal di 2024. E ultimo aki a resulta di un inflacion diferencial un tiki mas amplio cu Merca compara cu e di dos kwartaal di 2024. Specificamente, e tasa di inflacion averahe pa 12 luna na Merca (3.1 porciento) tabata mas halto cu na Aruba (2.0 porciento) durante e periodo bao revision.
Mester nota cu e tasanan di inflacion averahe pa 12 luna na ambos pais tabata mas abao na 2024, cu inflacion na Aruba bahando mas lihe cu na Merca.
