Recientemente, Banco Central di Aruba a publica su Monthly Tables pa luna di januari ultimo. Pa loke ta credito, esakinan ta mustra un panorama di stabilisacion.

Na januari 2025, panorama di credito bancario na Aruba a continua mustrando un mezcla di stabilidad y movemento strategico. Segun datonan di Banco Central di Aruba (CBA), e saldo pendiente total di credito bancario a aumenta levemente na Afl. 4.731.1 miyon, un aumento modesto di Afl. 5.5 miyon (0.1%) compara cu e luna anterior.

Mientras cu e cambio aki por parce menor, e cifra ta carga señalnan significante tocante nivel di confiansa, dinamismo economico y preferencianan di gasto y inversion riba e isla.

Credito di consumidor: Stabilidad of fatiga?
 E saldo di credito di consumidor a keda relativamente sin cambio, na Afl. 1.706.0 miyon. Esaki por refleha un posicion conservador continuo entre consumidornan despues di añas di presion economico – incluyendo inflacion global, aumento di prijs di utilities y cuminda, y incertidumbre laboral. E falta di aumento por indica fatiga financiero of un decision consciente pa preserva ekilibrio economico den hogar.

Di otro banda, e stabilidad den credito di consumidor tambe por keda interpreta como un señal di madurez y responsabilidad financiero, specialmente si e ta compaña pa tasanan saludable di repago. Prestamo responsable ta sostene stabilidad den sector di banco, maske si e tendencia aki di prestamo abao continua a largo plaso, e por afecta actividad economico, particularmente den retail y servicio.

Hipoteca: Propiedad como un refugio financiero
 Den contraste, credito di hipoteca ta sigui aumenta – un indicador persistente di demanda pa vivienda. Cu un aumento di Afl. 9.2 miyon (0.6%), e saldo total di hipoteca a alcansa Afl. 1.561.4 miyon. Esaki ta sugeri cu a pesar di tasanan di interes mas halto den ultimo aña, e hamber pa propiedad ta keda fuerte.

Den region di Caribe y America Latino, tin un tendencia notable: real estate ta ser mira como un inversion safe den temponan di incertidumbre. Aruba no ta un excepcion. Cas propio ta fungi tanto como un shelter y como un activo financiero – un hedge contra inflacion y un herment pa construi capital. Esaki probablemente ta contribui na e continuacion di transaccionnan den real estate y ta impulsa prestamo pa hipoteca.

Credito comercial: Un speransa di optimismo entre entrepreneur
 Credito comercial a aumenta modestamente cu Afl. 3.8 miyon (0.2%) na un total di Afl. 1.952.2 miyon – sugeriendo otro tendencia notable: reactivacion dentro di sector di negoshi. E aumento aki por ta chikito, pero e por refleha un resurgencia slow di confiansa den e pronostico comercial.

Crecemento, maske chikito, den credito comercial ta significante, ya cu inversion tipicamente ta prome cu produccion y creacion di trabao. Si negoshi – particularmente empresa chikito y mediano – a cuminsa inverti den inventario, expansion of mehoracion, esaki por traduci den mas empleo y actividad comercial den futuro.

Un angulo importante pa observa ta si e credito comercial aki ta bayendo den sectornan strategico manera turismo, tecnologia of energia renobable – of ta kedando den industrianan mas tradicional. Un cambio pa bay den inversion strategico por amplifica e impacto di crecemento.

Economia den mocion

E stabilidad general den credito total ta positivo pa sector bancario. Riesgonan ta keda relativamente abao, portfolionan ta stabiel, y no tin indicacion di un bubble di credito. Sinembargo, e pregunta esencial ta keda si e momentum actual ta suficiente fuerte pa sostene e crecemento economico mas amplio di Aruba, specialmente na un pais cu ta depende riba consumo, turismo y reinvencion.

Den e fase post-pandemia, Aruba ta haya su mes memey di reconstruccion y recalibracion. Tendencianan di credito – sea den consumo, vivienda of negoshi – ta actua como un thermometer pa confiansa financiero y intencion.

Januari 2025, cu su movemento limita pero significante, ta mustra un pais y un sector bancario drentando un periodo di stabilidad – pero cu cautela.

E proximo lunanan ta bay revela si esaki ta e trankilidad prome cu un sprint, of ta e velocidad stabiel di un marathon economico largo.