Den nos edicion di dia 17 di November, Bon Dia Aruba a publica un articulo titula “Ken tin supervision riba e supervisor? Cantidad di hende implica den casonan di corupcion ta keda sin investiga”. Relaciona cu e articulo aki, Banco Central di Aruba (CBA) a manda un carta aclariando su rol den e situacion.
Den e articulo, Bon Dia Aruba a cuestiona e rol di CBA – entre otro – den caso Avestruz: Na momento cu un ciudadano di otro pais kier manda un suma cuantioso di placa, esaki ta pasa door di Banco Central. Den e caso aki, Banco Central a haci su due diligence pa controla si e fondonan tabata legitimo? Si su proposito tabata legitimo? Con Banco Central ta controla transaccionnan asina cu por ta conecta na actividadnan criminal? Y kico ta e rol di Financial Action Task Force den controla e tipo di transaccionnan aki? Ken tin autoridad pa haci e control aki? Y na momento cu e placa ta yega na un banco comercial, atrobe, esaki no tin responsabilidad pa controla di ken y di unda e placa ta bin?
“Na momento di emiti un licencia pa cambio di divisa, CBA solamente ta verifica e proposito y e intencion di e disposicionnan di Ordenansa Nacional riba transaccion di divisa (AB 1990 no. GT 6) (LDV). Awo cu LDV tin como meta pa regula transaccionnan di divisa di e pais pa regula e movecion di divisa di e pais, CBA ta inclui solamente e aspectonan tecnico den su evaluacion y no ta inclui ningun otro aspecto envolvi, manera e bondad y moralidad di e partidonan involucra,” e carta ta indica.
“Investigacion riba fluho di salida y entrada di placa como tambe riba e partidonan involucra mester wordo ehecuta principalmente pa e banconan comercial a base di e Ordenansa Nacional riba Prevencion y Combatimento di Labamento di Placa y Financiamento di Terorismo (AB 2011 no. 28) y e reglanan basa riba esaki. CBA ta sigura cumplimento cu ley y regulacionnan relevante y por, si ta necesario, tuma accion den caso di incumplimento, incluyendo a traves di sancionnan administrativo.”
Nota di redaccion:
Cu esaki Banco Central ta laga sa cu nan no tin un papel pa hunga den eventual placa dudoso cu ta drenta Aruba. E responsabilidad aki ta keda na e banconan comercial, cu ta realmente e ‘gatewatchers’ den esaki, pasobra asina nos leynan ta.
Asina por a pasa algun aña pasa cu un compania di doño dudoso kier a trece un suma grandi – 300 miyon dollar – y si no tabata pa e banconan comercial, e placa di origen dudoso ey lo a yega Aruba. E pregunta ta si no ta tempo pa CBA en berdad cuminza bira ‘gatewatcher’ tambe.
