ORANJESTAD – Segun un reporte recien, publica riba website di CBA, sentimento di consumidor a mehora den e ultimo trimester di 2018, resultando den un Indice di Confiansa di Consumidor di 97,0, un aumento di 2,7 punto di indice compara cu e periodo anterior, segun e ultimo resultadonan di e Encuesta di Confiansa di Consumidor (CCS) di Banco Central di Aruba (Grafiek 1).
E Indice di e Situacion Actual a mehora den e ultimo trimester di 2018, subiendo cu 3,3 punto di indice na 95,9. Consumidornan tabata positivo riba nan situacion personal financiero actual, como cu e indice aki a bira optimista, subiendo di 95,3 te na 102,5 (Grafiek 2). Maske e otro componentenan di e Indice di Situacion Actual a keda pesimista, consumidornan a raporta un expectativa menos negativo riba e otro componentenan di e Indice di Situacion Actual, cu excepcion di e situacion financiero actual di gobierno, cu a keda igual na 93,3 (Grafiek 2).
E Indice di Expectativanan ta esun cu a mehora mas hopi den e trimester bou di revision. E indice aki a mehora cu 3,3 punto di indice te na 97,8. Consumidornan tabatin expectativanan positivo ariba nan situacion personal financiero, como cu e indice aki a bira optimista den e ultimo trimester di 2018, subiendo di 98,0 te 104,4 (41,6% di respondientenan a indica cu nan situacion personal financiero lo ta miho den e siguiente 6 luna). Respondientenan tabata ainda pesimista riba e otro componentenan di e Indice di Expectativa, pero cu un bista menos negativo compara cu e trimester anterior.
E Indice di Habito di Consumo a mehora den e ultimo trimester di 2018, subiendo cu 2,1 punto di indice te na 98,5. Consumidornan tabata positivo pa compra di aparato grandi (46,2%) y pa bay cu vakantie (69,3%). Mientrastanto, e otro componentenan tabata un tiki menos negativo cu e periodo di encuesta anterior, cu excepcion di haci un prestamo, cu a mantene na 95,2. E gran mayoria di respondientenan (72,7%) ta anticipa cu prijsnan lo subi den e siguiente 6 luna, resultanto den un Indice di Expectativa di Prijs di 90,4.
Resumiendo, e mehoracion den e confiansa di consumidor ta atribui na aumentonan den tur componente, cu excepcion di e Indice di Expectativa di Prijs (Tabel 1).
