Banco Central di Aruba (BCA) a publica e “Economic Outlook” di augustus 2024. E publicacion aki ta contene pronosticonan economico pa 2024 y 2025.

BCA ta pronostica cu Producto Domestico Bruto (PDB) real lo crece cu 6,1 porciento na 2024 y 1,0 porciento na 2025, esta, respectivamente cu Afl. 329,8 miyon y Afl. 59,2 miyon. E crecemento aki ta principalmente empuha pa aumento fuerte den servicio y entrada di turismo.

PDB real ta proyecta pa yega Afl. 5.724,7 miyon na 2024 y Afl. 5.783,9 miyon na 2025. Exportacion turistico den termino real ta premira di subi cu 8,3 porciento na 2024 y 2,1 porciento na 2025. E cantidad di turistanan cu ta permanece por lo menos un anochi riba nos isla na 2024 y 2025 ta proyecta pa crece cu 12,8 porciento y 2,0 porciento, respectivamente. Mientrastanto, ta calcula cu e promedio di e gasto diario di turistanan lo keda stabiel na 2024 y aumenta na 2025.

E continuacion di proyectonan di construccion relativamente grandi – principalmente relaciona na e sector di turismo – ta sigui pusha inversion priva na 2024. Ademas, debi na e surplus presupuestario significante di gobierno na 2024, manera anticipa door di BCA, inversion publico tambe lo expande relativamente fuerte na 2024. Na 2025, sinembargo, tanto inversion priva y publico probablemente lo disminui. Di acuerdo cu esaki, crecemento den inversion den termino real na 2024 ta proyecta na 17,6 porciento y na 2025 inversion lo baha cu 8,7 porciento.

Consumo den termino real ta proyecta pa crece na ambos 2024 (+0,9 porciento) y 2025 (+0,5 porciento), debi na desaroyonan positivo tanto den e sector priva como e sector publico. Pa ta specifico, ta proyecta cu empleo lo aumenta cu 1,6 porciento na 2024 y 1,5 porciento na 2025. Ademas, ta anticipa cu salario lo crece cu 2,7 porciento na 2024 y 0,5 porciento na 2025, a consecuencia di indexacion di salarionan pa inflacion y condicionnan preta riba mercado laboral den sector priva y tambe di e indexacion acorda relaciona na salarionan di sector publico.

Importacion ta sigui e desaroyonan den consumo, inversion y exportacion. Na 2024, e aumento anticipa den exportacion, inversion y consumo lo conduci na mas importacion, mientras cu e caida den inversion na 2025 ta anticipa pa disminui importacion den termino real den e respectivo aña. Consecuentemente, importacion den termino real lo aumenta cu 5,3 porciento na 2024, y baha cu 1,2 porciento na 2025.

E Balansa di Pago (BdP) ta premira pa registra un surplus di Afl. 107,9 miyon na 2024. E surplus na 2024 ta debi principalmente na entradanan mas halto di turismo. Mientrastanto, pagonan di importacion ta conduci na salidanan significante riba e BdP na 2024, mitigando asina e surplus total. Ademas, BCA ta anticipa cu e compranan di accion den companianan door di residentenan for di no-residentenan, pagonan di dividendo na no-residente, y pagonan di interes na no-residente lo causa mas salida di divisa. Na 2025, BCA ta calcula un surplus di Afl. 645,7 miyon riba e BdP, mirando cu ganashi y entradanan di turismo ta surpasa pagonan di importacion, cual lo causa un surplus grandi riba e cuenta coriente di BdP.

Pa loke ta trata aumento di prijs, BCA ta proyecta un tasa di inflacion, basa riba un promedio di 12 luna, di 1,6 porciento na 2024 y 0,5 porciento na 2025, cu e componente di inflacion basico (locual ta exclui cambio den prijs di cuminda y energia) como e determinante principal di inflacion total.

Tabel 1 ta resumi e crecemento pronostica den PDB y su componentenan.

Turismo
 Pa loke ta turismo, e publicacion di Banco Central ta nota cu na 2023, sector di turismo tabatin un prestacion fuerte cu exportacionnan real di turismo expandiendo cu 6.7 porciento, compara cu 28.9 porciento na 2022.
E cantidad total di bishitante stay-over a aumenta cu 14.5 porciento compara cu e aña anterior, alcansando un total di 1,260,402 bishitante. Aumento den e cantidad di bishitante di Merca (+95,207 bishitante; +11.1 porciento), Canada (+21.882 bishitante; +52.9 porciento), y Colombia (+19.265, bishitante; +57.7 porciento), tabata e contribuidornan principal pa e crecemento menciona ariba.

Sinembargo, na 2023 e gasto pa cada bishitante a baha cu 1.2 porciento, un reduccion for di 2.6 porciento na 2022.

Prestacion di sector hotelero tabata ‘buoyant’ na 2023. Durante e aña bao revision, RevPAR (revenue per available room) a aumenta cu 14.7 porciento compara cu 2022 (+56.0 porciento.) E aumento menciona tabata pa motibo di un tasa di ocupacion di hotel mas grandi (2023: 78.0 porciento vs 2022: 75.0 porciento) y un aumento di 10.4 porciento den e ADR (average daily rate.)

Simultaneamente, e categoria di ‘otro acomodacion’ tambe a registra crecemento den termino di bishitantenan stay-over (+26.5 porciento.) Ademas, e ADR mensual pa propiedadnan di huur short-term (short-term rentals) na 2023 a surpasa consistentemente e ADR mensual pa propiedadnan di huur short-term reporta durante e aña anterior. Consecuentemente, na 2023, entrada total di propiedadnan di huur short-term a expande cu 42.2 porciento compara cu 2022. Amplifica pa un aumento den e ADR y den e nivel general di prijs di bienes y servicio, entrada di turismo a aumenta cu 14.6 porciento compara cu e aña anterior (2022: 38.4 porciento.)

E publicacion completo ta disponibel riba website di BCA (www.cbaruba.org).