Caya Grandi ta sigui den problema..A pesar di inversion haci

Caya Grandi ta continua den problema. A pesar di e inversion miyonario haci den mehoracion di  e parti aki di e centro comercial di Playa. Recientemente varios tienda den e area aki a cuminsa yega na final di nan capacidad di absorbe golpi y a dicidi di termina operacion. Cuanto mas ta den situacion dificil pero talbes no a tira e serbete ainda, no ta conoci. Momento pa nos repasa e aspectonan mas sobresaliente di e asunto aki.

Caya Grandi a haya bastante atencion y inversion di actual gobierno, desde nan entrada na 2009. Mayoria di hende tabata entusiasma, sigur e empresarionan di e caya mes, cu por fin a mira luz na horizonte pa nan problemanan. Kico tabata e problemanan? Ya caba tabatin un competencia fuerte di negoshi cu a bay establece den otro area, principalmente a base di miho acceso cu auto. Na e altura ey ya a inicia e desaroyo comercial dilanti e hotelnan ‘high rise’ cu a trece competencia pa Caya Grandi. Ademas e exodo di negoshi den tur direccion banda di e camindanan principal a tuma forsa caba. Esaki no a termina ainda; nos por observa bastante negoshi nobo riba e caminda Tanki Flip – Tanki Leendert – Paradera – Santa Cruz. Hasta por bisa cu e caminda aki ta parce di ta bira un ‘highway’ economico nobo, bao di impulso di demanda pa lugar di negoshi unda por yega cu auto facilmente.

Manera conoci, e renobacion di Caya Grandi a tuma demasiado tempo, cu perdida substancial pa mayoria di negoshi. Pa corona obra, ora cu nan a kere cu nan a sali di e problemanan, a bin e tremendo idea pa introduci parkeer meter. Riba su mes talbes paga pa staciona auto no ta algo di otro mundo, pero e forma con a implementa no a gana premio di beyesa. Ademas, esaki solamente a accentua mas ainda e desbentaha cu  henter centro tin compara cu otro area cu si tin bon acceso cu auto, y gratis.

Tin mas cos cu no a bay bon y a contribui na e situacion actual cu Caya Grandi no ta parce di ta move den un direccion mas positivo. Por ehemplo, e fenomeno di e tram cu no ta contribui na trece mas clientela den caya, pero di otro banda si a stroba pa logra un caya atractivo, no cu tienda so pero cu bar y restaurant, cu por duna bida den oranan di anochi. Pa por haci esey mester tin e posibilidad di pone terasa den caya y esey cu e tram a bira imposibel. Miho tabata, si ta insisti den tin un tram, pa laga esaki core den e cayanan paralelo (Steenweg, Nieuwstraat) unda tin mas edificio monumental cu den Caya Grandi mes. Asina por a desaroya Caya Grandi como area exclusivo pa peaton, cu amplio posibilidad pa ‘horeca’, creando un balor agrega cu Caya Grandi no tabatin den pasado. Manera semper, nos gobiernonan ta domina e arte di scucha e conseheronan robes manera ningun otro, y nos ta termina cu un Caya Grandi cu a costa hopi placa, ta mustra aceptabel pero no ta sigui desaroya y ta parce di ta keda condena pa ta un caya di tienda, cu den oranan di anochi ta morto, salvo pa e chollernan pa ken no tin solucion keto bay. Nos por corda tur e critica riba gobierno anterior, cu tampoco a gana premio cu nan esfuersonan, pero mientras tanto nos ta den aña 7 di otro gobernacion y ta birando ridiculo pa cada biaha tende e discurso cu ta cuminsa cu e frase:”Ora nos a tuma over na 2009 nos a bin haya e luga na werki, anto…”.

Pero tin mas cos cu no a bay bon. Un di nan ta cu a enfoca solamente riba e caya principal y no riba henter e area entre Emanstraat y Wilhelminastraat. Cu e consecuencia cu awor nos tin un Caya Principal nechi, pero ora bo dobla skina bo ta kere cu ta den tempo di guera bo a cay. Ta berdad cu gobierno a traha duro riba e plaza patras di Oficina di Gobierno, integrando diferente monumento den un proyecto cu tin su atraccion, pero entre esaki y Caya Grandi a keda un ‘no man’s land’ pa cual aparentemente no tin placa pa desaroya esey tampoco. Como agravante, gobierno hopi laat den e wega a bin haci un intento pa integra e comerciantenan di e area den un organisacion cu mester dirigi mas desaroyo den e area, un asina yama Business Improvement District (BID). A nombra un persona pa lastra e garoshi aki, pero despues di anuncio di su nombramento ta poco resultado concreto a bin dilanti.

Tabatin cos cu a bay bon tambe den e renobacion di Caya Grandi? Sigur cu si. Con cu bay bin, e area ta mustra hopi mas agradabel, y principalmente Plaza Daniel Leo a keda hopi atractivo, sigur cu e edificio nobo di Zara cu a caba di habri. Por haci mas, pero esey ta exigi un plan total pa henter e area, anto net p’esey parce cu DOW no tin experto…