Por lo pronto, prome ministro Eman a posiciona su mes na prome luga pa loke ta tuma decision gubernamental rapidamente.

Esey diamars ultimo den parlamento, unda el a dicidi di aboli e klem riba auto mal staciona den un solo tiro. De paso poniendo un banda posibel decision di parlamento encuanto mocion introduci tocante e tema di Caya Grandi. Un biaha mas demostrando cu realmente parlamento ta irelevante. Un palabra di gradicimento na su persona pa corda nos riba esey…

En todo caso, por bisa cu ora campaña ta den proceso, ta bira hopi mas facil pa gobernante tuma decision ‘a lo macho’. Esaki ta loke aparentemente e delegacion di comerciante di Caya Grandi a logra, pero ta duda si esey ta realmente suficiente pa cambia e rumbo cu e caya ta aden. Den pasado recien, e problematica di e area comercial di Playa tabata tema di e editorial aki varios biaha. Pa esunnan cu talbes no a haya oportunidad pa lesa esey, nos ta resumi e puntonan clave di e asunto aki.

Pa cuminsa, gobierno actual na 2009 a cuminsa cu hopi briyo y bon boluntad, pero careciendo berdadero vision, cu e proyecto di duna Caya Grandi un bida nobo. Den e entusiasmo a lubida di inventarisa prome kico tabata punto clave pa logra exito den e proyecto, cualnan ta, entre otro: cambia e caracter di puro tienda pa un mescla di retail y horeca; trece sombra pa haci shopping den e oranan mas cayente factibel; resolve e problema di parkeo na un forma cu ta faborece comercio; tene e periodo di transicion mas cortico posibel pa comercio por sobrevivi; kico e tram lo a bay contribui mirando cu ta trata di un area di peaton principalmente; crea un organisacion supervisor cu participacion di comercio desde inicio, no despues.

Riba tur e puntonan importante aki a scoge robes. A bin cu e tram como un supuesto idea fantastico, sin algun studio ki efecto e lo tabatin. En todo caso, e tram tabatin como consecuencia cu e yegada di ‘horeca’ den forma di restaurant, bar y principalmente terasa, a bira imposibel. Tambe a bira imposibel crea sombra pa duna proteccion den e oranan mas cayente, y crea mas ambiente. Loke a keda ta un tunnel largo unda e tram mester pasa, y na banda di baina espacio pa hende cana, dañando henter e aspecto di e caya. Y kico a haya como recompensa? Un tram cu turista cu no ta ni baha, pero ta pasa den e caya ‘sightseeing’ e localnan canando na banda. Cu esaki, Caya Grandi a keda te awe esencialmante un caya di tienda, cu despues di 18:30 ta morto…

A opta tambe pa alarga e proceso di transicion, causando cu varios negoshi no por a soporta mas y a cera of bay otro luga pafo di ciudad. Y finalmente a bin te na ultimo, despues di varios aña di gobierno dictando e cambionan, y despues cu e organisacion di comerciante (Mambo) mes a fayece,  a bin riba e tremendo idea di organisa un ‘Business Improvement District, (BID), loke ta algo cu mester a haci, segun tur ‘textbook’ di e materia di desaroyo urbano, na inicio di e proceso. Awor, cu un cantidad di ‘stakeholder’ rabia o decepciona, o ambos, ta ‘mosterd na de maaltijd’ pa bay organisa esaki. Y di e manera aki a caba di seya e fracaso di e proyecto, cu a costa hopi placa y a trece masha poco aspecto positivo.

 

Pa colmo, a bin cu un solucion pa e problema di parkeo cu no a keda bon ehecuta y tabata blanco di critica di tur banda. No cu no tabata existi un problema, ban ta franco. Ken no ta corda e situacion anterior unda tabatin un situacion desesperante cu trafico pega, auto staciona tur caminda unda hende mester cana… E trafico ta mes pega ainda, pa e simpel motibo cu nos tin miles di hende cu mester ta den centro tur dia. Cualkier areglo, cu of sin pago pa parkeer, cu of sin luga paga mensualmente, no ta resolve e problema cardinal, esta cu e centro di ciudad chikito di nos ey no por handle tanto trafico, punto.

Y kico ta consecuencia di tur esaki? Laga nos ripiti loke nos a bisa dia 17 di  december 2016 tocante e asunto: “Prome cu tur cos, mester dicidi ta ki tipo di Caya Grandi nos ta desea. Nos kier conserva un caya di tienda cu di mes no tin nada di haci anochi? Of nos kier un mix di horeca y retail? Nos kier espacio pa diversion (terasa) of nos kier un tram keda acapara e espacio mayor? Nos kier crea sombra pa competi cu otro area comercial cu tin esey, of nos ta laga tur cos manera cu e ta? Tur esakinan ta pregunta cu mester a haya un contesta shete aña pasa. Pero ta di comprende cu den euforia di victoria electoral a djis cuminsa haci ‘cos’. Esey awor ta resulta insuficiente.”

Kico a cambia den e ultimo lunanan? Aparte cu nos prome ministro a bira mas ‘Rambo’ den e cuestion di klem, nada.