Un acto di venganza di un persona ayera a percura pa tur atencion ta dirigi atrobe riba e situacion den centro di Playa. E ta obliga nos pa contempla atrobe e situacion penoso, di cual nos sa cu no a cambia tanto den ultimo tempo. E adictonan ambulante ta sigui como un di e problemanan principal, y ta parce cu un solucion ta mas aleha cu nunca. Pa hopi tempo nos no ta ni tende autoridadnan concerni dedica algun atencion na e tema aki. Y di mes e problema aki lo no desaparece; ta nos lo mester haci algo pa logra esey.
Nos no sa si e Plan di Crisis Social ta encera algun programa pa atende e problema di adicto, en general o specificamente pa centro di Playa, y San Nicolas, cu ta lidiando pa añanan cu e mesun problema. En todo caso, no por ta e idea pa warda te dia ciudadano tuma ley den nan mes man, pa despues nos haya nos politico y autoridadnan lamenta loke ta pasando.
Pero e problema di adicto den Playa no ta un problema isola. E tin di haci cu henter e descuido bao di cual e area ta sufriendo. Na inicio di e actual gabinete a bin varios promesa pa promove actividad den Caya Grandi, pero nos no a tende tanto mas di iniciativa pa mehora e situacion deprimente aki. Den combersacion cu varios empresario den e area ta notabel cierto disgusto y desanimo cu no ta contribui na crea un ambiente positivo tampoco. Ademas di esey e aspecto fisico tambe ta hunga un papel. Por ehemplo, e matanan grandi den e caya cu den dia ta duna algo di sombra, tampoco perfecto pero enfin, pero anochi ta percura cu bo no por mira nada kico ta bin bo dilanti si bo cana na e oranan ey den Caya Grandi, loke ta duna esaki un aspecto di insiguridad. Realmente nos por bisa cu a pesar cu awendia auto por pasa den Caya Grandi anochi, no por bisa cu tin di berdad un motibo valido pa bay pasa eyden. E caya a keda loke e tabata semper, un caya di tienda unda despues di seis or di atardi no tin nada di haci, y p’esey no ta nada straño cu e ta keda teritorio di esunnan cu ta biba den marduga.
Si nos kier pa e situacion aki cambia, ta hopi diferente cos mester sucede na mesun momento. Aki nos a toca un punto debil di gobernacion, pasobra a pesar cu tanto aña pasa e fenomeno ‘coordinador’ a bin aden, ta dificil y den cierto caso hasta inutil pa spera di gobernacion accion coordina. E desorden cu ta tumando luga actualmente cu e construccion di tantisimo rotonde pareu, niun ta un y niun ta keda cla, ta causando un molester casi insoportabel pa henter comunidad. Y papiando di coordina, e departamento concerni tabata bisa cu ta despues cu e obra ta cla nan ta bay wak ta kico e contratista a haci y e contratista tabata bisa prensa cu e no ta deal cu niun hende. Den esey a bin algun mehoracion a base di critica fuerte, pero en todo caso nos mester soporta e situacion aki pa varios luna ainda.
Pero, pa bolbe na Caya Grandi, cu a sufri añanan largo pa obranan di infrastructura aki, ban repasa loke sigur mester tuma na cuenta si berdaderamente e intencion ta pa mehora e situacion den centro di ciudad. Pa cuminsa cu e aspectonan strategico pa futuro di comercio en general. Kico realmente ta e perspectivanan pa Caya Grandi como centro comercial? Hopi aña pasa Camara di Comercio a laga traha un analisis encuanto futuro di diferente area comercial riba nos isla. E conclusion e tempo ey caba, mas di 15 aña pasa, tabata cu e competencia fuerte di otro zona comercial, manera e inicio di e actividadnan comercial dilanti e hotelnan, e mudanza di hopi tienda pa otro districto (South Beach, Nort, caminda Tanki Flip – Santa Cruz) y e proyecto di comercio combina cu acomodacion turistico riba tereno di waf di e tempo ey no tabata brinda tanto speransa pa Caya Grandi recobra algo di su vitalidad. Nos ta tanto aña despues y e salida di comercio di Caya Grandi no a stop. Pa colmo ta bin atrobe un proyecto di mesun caracter cu anteriormente riba tereno di waf. Cu esaki nos no ta declara nos mes inmediatamente como adversario di e plan pa re-uso di e area di waf, pero nos ta curioso pa mira e estudionan traha, pa por sa si a tene cuenta cu e exceso di oferta di espacio comercial cu nos tin caba riba e isla aki. Y den esey no ta Caya Grandi so ta sangrando; tin hopi mas mall cu ta lidiando cu nan espacio pa haya suficiente inquilino pa por paga banco fin di luna.
E deterioro di un centro di ciudad y e lucha pa despues recobra e tereno perdi ta algo cu nos ta comparti cu tanto otro pais y ciudad. Pero nos no ta mira e plan general cu mester pa ataca e asunto aki, den caso di Playa y San Nicolas, cu e contundencia necesario.
