Caya Betico Croes of miho conoci como Caya Grandi ta un di e areanan cu mas a wordo afecta desde algun aña pasa. Na momento cu pandemia di Covid-19 a yega na Aruba a causa un impacto hopi grandi pa economia, afectando practicamente tur sector y tur persona den nos comunidad. Pero di otro banda, den e temporada aki Caya Grandi a haya movecion cu algun comerciantenan a categorisa como “positivo”.
Bon Dia Aruba a sali riba caya pa puntra algun doño di negoshi na Caya Grandi con nan ta haya e situacion na e momentonan aki, cu ta dianan di Pasco y Fin di Aña, tumando na cuenta e ambiente inusual cu ta reina e aña aki. Pa loke e reaccion tabata uno di optimismo y positivo.
Asina a expresa un di nan, cu tambe a menciona cu e dianan aki nan benta tabata “un tiki mas miho” compara cu un otro temporada. E doño di negoshi (cu a prefera di keda anonimo), a expresa cu aunke ainda e efectonan di pandemia t’ey, nan ta sinti cu den comunidad tin hende cu a sali y bin caya pa haci su compranan pa Pasco y Fin di Aña.
Un otro doño di un negoshi nobo cu segun a comenta a habri tres siman pasa den mesun caya aki, a bisa cu nan ta hayando mas movecion di hende den oranan di atardi compara cu den oranan di mainta. Di mesun manera e persona aki, cu a bin for di Corsou, a menciona cu compara cu Aruba eynan e situacion a bira mas delicado pa via di e cantidad di casonan cu nan ta hayando pa dia y cu medidanan como toque de queda te ainda ta vigente. Mientras cu na Aruba, gobierno a anuncia siman pasa cu no tin intencion di introduci mas medida pa preveni transmision di covid durante dianan di celebracion di Pasco.
Por a mira tambe cu algun negoshi a cera pa via di e crisis economico y cu hopi hende a perde nan trabou, loke a pone cu e caya ta mustra un poco solitario. Pero loke si por afirma ta cu pa comunidad di Aruba, aunke por ta pasando den un temporada dificil, te ainda e espiritu di Pasco y Fin di Aña t’ey y pueblo a sali pa haci nan compras di e temporada aki.
