Den cuadro di fin di aña, e comision cu ta plania Ambient’i fin di aña lo trece diferente actividadnan den Caya Betico Croes. E comision ta consisti di representantenan di diferente ministerionan di Gobierno. Lindy Croes -kende ta un comerciante cu riba su mes- a trece varios actividadnan caba. Sra. Croes ta representa Prome Minister Evelyn Wever-Croes. Esaki segun e relato ricibi di Gobierno.
Sra. Croes ta elabora mas riba e actividadnan cu lo bay tin e ultimo dianan di aña e fin di siman aki: “E meta di e actividadnan di fin di aña ta pa trece un ambiente diferente den Caya Betico Croes sperando cu esaki lo continua henter aña, pa asina nos centro di ciudad haya bida bek y negoshinan por florece y crece manera cu antes tabata e caso y publico por yega mas constantemente pa haci nan compra nan den centro di nos ciudad.”
E fin di siman aki, prome cu nos yama 2017 ayo, Ambient’i fin di Aña lo ta grandi atrobe cu diferente atraccionnan pa nos comunidad. Awe y mayan, diasabra, e orarionan di operacion di e tiendanan ta keda normal y algun tienda lo habri nan porta riba dia 31 pa cende nan pagara.
Artistanan local Niro y Zyon lo trece ambiente musical awe atardi. Pa diasabra lo tin Dande den Tram. Y tipico Ta Cla lo deleita un y tur cu musica nan pa trece e Ambient’i fin di aña. Jeon lo duna su concierto pa cera Ambient’i fin di Aña cu un toke special.
Lo tin diferente entretenimento nan pa nos muchanan incluyendo Santa Claus, kende ta warda tur mucha pa bin saca potret pa keda cu un recuerdo special. Pa esunnan di mas chikito lo tin Dino Jump. Lo tin hopi sorpresa mas y hopi premionan atractivo incluyendo 50 bais, weekend stay, y hopi mas.
