Cataloga como di ‘riesgo halto,’ cliente ta keha cu kita 250 Florin pa aña di su cuenta pa screening

ORANJESTAD – Reciente riba medio social un persona a remarca cu na banco CMB ta implementa un cuota anual di 250 Florin cerca tur cliente di nacionalidad Venezolano bibando na Aruba. A base di esey, Bon Dia Aruba a acerca señora Narvaez pa splica tocante su caso. Segun Narvaez, e splicacion di banco ta cu nan mester haci extra screening pa motibo di problema cu ta pasando na Venezuela, pero e ta opina cu Venezuela no ta e unico pais cu ta den crisis.

Pais manera Haiti tambe ta pasa den momento dificil y na Aruba no ta kita un cantidad di placa for di nan cuenta. Locual Narvaez ta agrega ta cu su conclusion ta uno negativo y cu ta trata aki di ‘discriminacion’. “Mi tin prueba di esaki. Aña pasa nan a nenga mi mama habri un cuenta na e banco aki.”

Sin embargo Narvaez ta bisa cu otro motibo pakico e ta haya cu no ta profesional, ta cu el a ricibi un carta anto el a dirigi su mes na e banco CMB Santa Cruz unda cu e meneer na e bali, ni e manager no tabata sa kico Narvaez kier men cu esey. E cliente a bay pa informa su mes, y si el a haya e información di adelanta, e lo a kita for su cuenta for di e banco pa “evita di perde mi placa.”

“E no ta profesional cu nan ta tuma placa di mi, anto mi ta busca splicacion anto ni e trahadornan sa kico ta pasando,” Narvaez a splica. E ta bisa cu no ta husto cu esaki ta wordo haci pa hendenan di Venezuela, anto ta pidi pa nan cambia di banco. “No por laga e cosnan aki pasa.” E ciudadano a bisa Bon Dia Aruba cu e conoce cuater otro persona cu nan placa tambe a wordo kita. “Nos ta traha tur mainta manera tur otro hende di otro nacionaldad.”

Bon Dia Aruba a puntra banco CMB anto nan a duna di conoce cu na november 2018 a anuncia e topico di nan ‘tarifa nobo di revision annual pa cuenta’ pa aclarea cualkier confusion. A duna informacion na un grupo selecto di nan clientenan. E carta ta pa solamente un grupo specifico di cliente, cu segun regulación, ta ser clasifica di tin un perfil di riesgo halto.

Segun banco, un biaha pa aña CMB tin cu cumpli cu un revision di cuentanan cu, segun e perfil, ta wordo categorisa como riesgo halto. Cu e revision periodico di tur tipo di cuenta, a insitui un departamento special creando gasto y inversion adicional. Pa e motibo aki a cuminsa implementa e cargo anual di 250 Florin na cada cliente clasifica como di riesgo halto.

E banco ta bisa acerca cu no ta cobra den cada cuenta cu e cliente tin. E suma di 250 Florin pa aña, ta ser cobra a base di cliente, sea individuo of como negoshi/organisacion. Si un persona individual tin dos cuenta, uno so ta ser cobra.

Pa locual ta trata miembro di famia, tambe lo ser cobra. Nan ta splica cu si acaso e perfil di persona ta exponi politicamente y consecuentemente clasifica como riesgo halto, nan ta obliga di clasifica miembro di famia.

Segun banco, lo cobra pa esaki den caso cu e persona sigui exponi políticamente pa e periodo clasifica como un persona di perfil riesgo halto y 5 aña mas despues cu e periodo termina. Ta conta pa e miembro di famia. Si no ta haya husto, por comunica cu nan via eAmigo of manda un mensahe di email na bobancoamigo@cmbnv.com.