Durante fin di siman tabatin otro trayecto di sterilisacion di e campaña Paws Uni Aruba. E campaña aki cu ta consisti di 12 fundacion y tin como meta disminui e problema di cacho y pushi riba caya a traves di e campaña di sterilisacion cu ta pasa den diferente bario na Aruba.
Ariba rednan social diariamente personanan ta publica di cacho of pushinan cu ta riba caya y cu mester di ayudo. Nan ta haci yamado na e fundacionnan pa yuda, pero lamentablemente mayoria di e fundacionnan ta man yen caba.
E lucha contra e problema di sobrepoblacion di cacho y pushi riba caya tin hopi añas caba andando y ta uno cu continuamente mester di atencion. Pa e motibo aki, pa purba trece un solucion pa e problema aki, Luna Foundation Aruba lanta e iniciativa di e campaña di Paws Uni Aruba y hunto cu 11 otro fundacion a uni pa combati e problema a traves di e campaña di sterilisacion cu ta pasa den diferente bario na Aruba.
E prome bario cu Paws Uni Aruba ta bishitando ta Madiki y den fin di siman cu a pasa a toca turno na e pushinan di Madiki y bisindario. A traves di e pagina di Facebook di Paws Uni Aruba, boluntarionan cu ta trahando pa yuda cu e bon causa aki a publica diferente potret di e trabaonan realisa durante e “Cat Extravaganza Weekend”.
Desde comienso di augustus Paws Uni Aruba ta activo cu nan campaña di sterilisacion den weekend. Nan a cuminsa na Centro di Bario Playa Pabao caminda residentenan di Madiki y bisindario por a trece nan mascota pa sterilisa sin ningun costo.
Den fin di siman, durante e “Cat Extravaganza Weekend” Paws Uni Aruba a traha for di e oficina di VSH Veterinary Specialty Hospital Aruba na Ponton. Esaki ta pa motibo cu e proceso di sterilisacion y cuido despues di sterilisacion pa pushi ta mas delicado cu esun di cachonan.
Aunke e problema di cacho riba caya ta mas visibel, pushinan ta un problema mas grandi ya cu nan por reproduci mas lihe cu cacho y por haya baby cada tres luna.
E boluntarionan di Paws Uni Aruba a cuminsa cu nan trabao desde diabierna buscando pushinan cu ta biba riba caya y tambe buscando pushi cerca nan doñonan cu no tin posibilidad di hiba nan mascota pa sterilisa nan.
E diferencia di Paws Uni Aruba ta cu e campaña no ta enfoca solamente riba sterilisacion, pero nan ta enfoca riba full e pakete, sterilisacion y cuido di e mascota. P’esey boluntarionan a drenta den e bario di Madiki prome cu e operacionnan a cuminsa pa papia cu e doñonan di mascota y brinda nan informacion tocante cuido di mascota en general y na mesun momento conscientisa e comunidad tocante con pa ta un bon doño di mascota.
