– Corte Superior a condena Indra Stamper pa 6 luna di prizon condicional, 2 aña di tempo di prueba, 240 ora di dienstverlening of 120 ora di detencion.
Ministerio Publico a apela e sentencia den Prome Instancia cu a declara Sra. Stamper liber na prome instante di e accidente fatal riba 21 di maart 2014. De e accidente na spiraalrotonde su amigo Ash Ramchandani a perde su bida.
Den su defensa, Sra. Stamper a trece dilanti cu e ta sufri di epilepsia pa basta tempo caba. Riba e dia fatal el a declara cu el a haya un atake unda e tabata for di tino. Diferente testigo a confirma cu nan a mira e pasahero purba di stuur y cu e chauffeur no tabata mustra na tino. Asina e auto a yega cu velocidad duro riba e caminda robes di e spiraalrotonde. Diferente automobilista a scapa un accident pa motibo cu nan a anticipa hopi lihe, pero finalmente e auto cu Sra. Stamper a dal contra un otro auto y e muraya di e rotonde. Segun corte mas victima por a cay si e otro automobilistanan no a reacciona asina adecua.
E huesnan ta bisa cu nan ta tene cuenta cu e situacion di Sra. Stamper y tambe su malesa. Sin embargo nan ta haya cu el a tuma un riesgo inacceptabel coriendo auto sabiendo cu e tin epilepsia cu tur chens pa haya un atake tras di stuur. Esaki ta un delito serio, corte ta haya.
Rijbewijs
Un punto remarcabel den e veredicto ta cu Sra. Stamper por a renoba su rijbewijs varios biaha sin problema. Pero e huesnan no ta haya cu e por a tuma esaki como excuus pa continua di core auto cu su malesa. “Aunke cu su dokter di cas a duna e permiso pa asina e por haya sea renoba su rijbewijs, e no por a conta riba e decision sin cu el a check cu e dokter realmente a evalua su situacion medico.”
Corte Superior si a tuma na cuenta cu Sra. Stamper nunca wordo condena y cu e victima ta su amigo. E echo cu e mester biba cu e culpa di ocasiona e morto di su amigo, locual e mes a expresa durante e tratamento den corte, corte a considera como un punto suavisante pa determina e castigo.
