Despues cu ayera anochi a keda conoci cu tin casonan nobo di transmision local di Covid-19 na Aruba, hopi rumor y comentarionan riba rednan social a cuminsa sali pa loke ta trata e personanan cu ta positivo.

Bon Dia Aruba a haya sa for di un fuente na DPL cu tur trahado di e departamento aki a wordo manda cas den cuarentena. Ademas a tuma contacto cu minister di Labor y di Asuntonan Social, Glenbert Croes pa loke el a confirma cu e cuarentena ta pa ‘motibo di precaucion’.

Di mesun manera, a puntra pa ki motibo ta tumando e precaucion, manera por compronde esaki di manera logico por ta pa via cu un trahado di DPL a wordo contagia cu Covid-19 of algun di nan a haya contacto cu un persona contagia, algo cu minister Croes no a drenta den dje asina hopi y a contesta pa Bon Dia Aruba cu e no tin detayenan di e caso aki.

Ademas, mirando e situacion cu ta existi cu e ayudo di FASE, tambe a puntra minister Croes con e proceso aki lo sigui, caminda cu tur trahado mester bay den cuarentena.

Minuutnan despues, por a mira cu minister Croes a confirma esaki ora el a publica na su pagina di Facebook: “Un consehero di bureau cu desde FASE ta trahando fisicamente na DPL awe a sali positivo pa Covid-19 y como medida di precaucion y prevencion minister a manda cera DPL y su bureau. Tambe el a manda tur trahado cas den cuarentena preventivo incluyendo minister mes. DPL y FASE ta keda activo online y tur hende lo keda traha for di cas.”

Tambe, Departamento di Salud Publico a manda un comunicado pa tur medio di comunicacion pa asina duna di conoce cu dia 3 di augustus a keda registra 2 caso di transmision di Covid-19 local na Aruba. Ayera tardi pa anochi DVG ta wordo notifica di 3 caso positivo mas. Esaki a haci cu e total di casonan di transmision local riba un solo dia yega na 5. E aumento den casonan local a conduci mesora na elevacion di e medidanan di contingencia, segun Plan di Maneho pa coronavirus.

Di mesun manera, awe 4 di augustus ta bolbe registra 5 caso di transmision local mas, elevando e casonan activo di transmision local na un total di 10. A pesar cu e cifra no ta uno alarmante, segun DVG mes a señala, e ta di preocupacion debi na e localidadnan na unda e personanan aki tabata traha y frecuenta. Unda tambe muy probablemente nan a contagia cu e virus y por a sigui plama esaki tambe pa mas persona den comunidad of mesun turistanan.

Debi na e magnitud di contagio cu por a tuma luga den e localidadnan aki DVG ta haci un yamada na comunidad pa pone extra atencion na su estado di salud den e dianan venidero. Si bo persona a bishita un di e siguiente localidadnan y awor ta sinti sintoma di entre otro: dolor di garganta, keintura, nanishi ta core, perdida di holo of smaak, no sali for di cas, tuma contacto cu dokter di cas via telefon of por yama tambe 280.01.01 pa haci un test di Covid-19.

Entre esunnan positivo, e “contact tracing” a saca afo cu nan tabata presente na un di e siguiente localidadnan menciona aki bou, entre 17 di juli cu ayera 3 di augustus. Si bo persona tambe tabata presente, bo por a bin den contacto cu e virus y por ta na riesgo di a keda contagia.

E localidadnan señala ta Gusto Night Club, Lola/Craft Bar and Restaurant and Night Club y Muscles and Lungs Gym.

Pa cu esaki, Departamento di Salud Publico ta haci un yamada na tur persona cu por tabata presente den un di e localidadnan menciona riba un di e dianan menciona (entre 17 di Juli te cu 3 di augustus), pa evita di bishita luganan publico pa e siguiente 2 siman y monitor bo salud. Si algun persona ta presenta cualkier sintoma, tuma contacto cu dokter di cas pa haci un test y mesora bay den isolacion te ora cu lo haya resultado di e prueba, di e manera aki por stop pa e virus sigui plama den comunidad.