Departamento di Aduana frecuentemente ta confronta e problema di importadonan cu ta purba drenta mercancia di contrabanda of mercancia no declara, ya sea via container of otro forma di transporte.

PR y Management Assistant di Duana, Marilyn Wout a laga sa na Bon Dia Aruba cu tur siman nan ta confronta e tipo di caso aki, y nan ta ‘basta’.

Pa atende cu e caso di contrabanda, cuerpo di duana tin su procedura. Si e impuesto cu mester wordo paga ta surpasa 250 florin e ta bira un proces-verbaal. Aduana ta traha un proces-verbaal, despues Douane Recherche en Informatie (DRI) ta caba cu esaki pa fiscal. E instancia aki ta esun cu ta dicidi y duna multa. Unabes cu e cliente ta paga e multa y e derechonan di importacion, e mercancia ta wordo entrega pa medio di duana na esun cu a purba di drenta nan di contrabanda.

Den caso cu ta trata di mercancia cu no mag di drenta Aruba, esaki si ta wordo confisca. Den tur otro caso, solamente mercancianan cu no a wordo declara so ta wordo confisca. Y e proceso ta mesun cos cu ta wordo bisa mas ariba.

Tambe tin caso cu nomber robes. Nan ta casonan caminda e comerciante of broker, importador ta pone un nomber ekiboca pa e mercancia y ta uza otro tarifa di impuesto. Si e pasa un suma di 250 florin, e ta confronta e mesun proceso manera ora e no wordo declara.

Tin hende cu ta haci nan compra online y nan ta wordo manda cu cierto empresa pa deliver. Pero tin biaha duana ta detecta cu no tur cos ta wordo declara pa e broker of compania, ya sea intencional of no, caminda e cliente inocentemente ta keda perhudica.

PR di departamento di aduana a splica cu den un caso asina aduana ta confisca solamente loke no ta wordo declara. Tur mercancia cu si ta wordo declara ta wordo entrega na nan doño. E departamento aki ta abstene di divulga nomber di empresa of comerciante cu ta comete e tipo di acto aki di trece mercancia di contrabanda of no declara.

Den caso general ora cu tin companianan cu no ta declara cierto mercancianan, nan lo confisca e mercancianan aki te na momento cu a keda cla cu e proces-verbaal. Fiscal ta duna e multa y e declaracion ta in orden, segun sr. Wout.