Casonan di malesa transmiti sexualmente ta aumentando cada dia mas na Aruba. E specialista di cuero, Dr. Nuris Lampe a referi brevemente riba e problema delicado aki, pa asina nos comunidad por bira mas consciente.
Dr. Lampe a desvia un poco di e topico central cu plataforma di promocion di salud di Departamento di Salud (DVG) a bin cun’e, pa asina como dokter di un forma responsabel evita e tipo di malesa aki den nos comunidad. “Mi kier pa pueblo ta hopi consciente di dje, pasobra e ta algo cu ta aumentando cada dia den nos pueblo”, e di.
E ta haya cu e ta algo cu por wordo evita pa medio di uzo di proteccion. E pareha mester ta mas abierto cu nan partner pa nan por comunica riba esaki. Tambe ta consehabel pa nan haci test clinico den laboratorio. E caso di syfilis ta creciendo den e periodo aki. Eventualmente esaki tin di haber cu e migracion y emigracion di hendenan cu ta drenta y sali fei nos isla.
Un malesa frecuente ta e virus di HPV (human papilloma virus) cu ta facil pa detecta den e parti genital. E fret cu tin den e parti genital ta e virus y bo mes por wak’e, sin mester bay dokter. Pero si ta consehabel pa bishita bo dokter di cas den caso cu bo tin’e.
Dr. Lampe a haci un yamada na e muchanan cu ta den contacto cu hendenan cu no tin screening di salud pa nan ta consciente di e risico aki, ya cu e casonan di malesa contagioso ta aumentando den nos poblacion. Proximamente plataforma di promocion di salud di DVG lo pone mas atencion rond di e topico aki.
