E casonan reciente di difteria detecta den e pais bisiña di  Venezuela ta bati bel cerca salud publico pa nos hendenan ta na altura di e malesa aki. 

Prensa di Venezuela, entre nan El Nacional ta indica cu mas cu 10 aña pasa e difteria tabata un di e causanan principal di morto di muchanan na Venezuela. Pero danki na e avancenan den mundo di medicina y e fabricacion di vacunanan, e malesa aki a wordo practicamente eradica y el a bira menor mortal.

Pero pa motibo di e crisis actual cu Venezuela ta pasando aden na falta di remedinan y vacuna, e cifranan di muchanan morto pa difteria a cuminsa crece cerca e muchanan menor di 9 aña.  Un caso lamentabel  cu nan  a trece dilanti tabata e mucha di 9 aña, Eliannys Vivas, kende  a cuminsa sinti su curpa malo cu dolor di garganta. Despues el a sigui bay atras y finalmente el a fayece victima di difteria cu ta un infeccion  grave causa pa un bacteria y cu lo por resulta falta pa e menornan di edad pa falta di vacuna. Actualmente den 18 estadonan na Venezuela a wordo registra casonan di difteria cu un saldo di 9 morto, asina El Nacional a informa.

Causa
Bon Dia Aruba su seccion salud ta trece mas informacion relaciona cu e bacteria aki.  E ta conoci tambe como difteria respiratorio; difteria faringea; cardiomiopatia difterica; polineuropatía diftérica. E ta wordo transmiti  ora cu un persona infecta ta tosa dilanti otro hende. E persona aki te hasta e por tin e bacteria aki sin mustra niun di e sintomanan. E bacteria aki  ta infecta mas tanto bo nanishi y garganta, aunke den algun caso e difteria ta infecta bo cuero prome y e ta produci algun lesionnan na bo cuero. Unabes cu ta infecta, e bacteria ta produci substancia peligroso yama toxinanan cu ta circula den bo sanger y ta afecta otro organonan di bo curpa entre nan bo curason, cerebro, etc..

P’esey un bon programa di vacunacion ta yuda pa protege of inmunisa  e muchanan cu ta e poblacion di mas riesgo. Dank na e vacuna, e difteria ta un malesa poco comun den hopi pais di henter mundo. Ademas di e falta di vacuna mester evita otro factornan di riesgo, manera un ambiente no higienico

E sintomanan
Un persona infecta cu difteria generalmente ta presenta e sintomanan entre 1 pa 7 dia despues cu e bacteria a drenta na su curpa. E por haya: keintura y calafriu, dolor di garganta, dolor ora cu e ta guli,  tosamento mahos, sacamento di baba ya cu e no por hala rosea bon, bo cuero ta haya otro color manera blauw,  nanishi ta core tin biaha cu sanger, problema pa hala rosea y lesionnan   riba bo cuero. Sinembargo mester tene  na cuenta cu algun ocasion bo no ta presenta e sintomanan.

Tipo di tratamento 
Si bo tin sospecho di presenta e sintomanan di difteria ta bon pa bishita bo dokter di cas. Generalmente e pashent cu  difteria ta haya un tratamento a base  di antitoxina difterica cu ta wordo aplica via hangua . Tambe e ta wordo trata cu antibiotica. E tratamento  lo por inclui, entre otro, si bo ta keda hospitalisa: suministro di awa di bida; oxigeno, hopi sosiego,  monitor di curason, aparato di respiracion, E difteria  lo por ta leve  of grave; y esun infecta su recuperacion di salud lo por tarda. E por ta mortal specialmente ora cu e malesa ta afecta bo curason. E posibel complicacion tin di haber cu inflamacion di bo musculo di curason (miocarditis). E sistema nervioso tambe lo por resulta afecta di forma grave y frecuente locual lo por ocasiona paralisis temporal.

E difteria ta un malesa poco comun, specialmente den paisnan cu ta cumpli cabalmente cu un programa stricto di vacunacion manera nos pais.  E aplicacion di e programa di vacuna di rutina pa e muchanan y e vacunanan pa reenforsa nan ora bo ta adulto, ta efectivo pa preveni  e malesa aki. E vacuna ta duna bo un proteccion di 10 aña so; p’esey ta importante cu e hendenan adulto por haya un refuerso cada 10 aña. E refuerso ta wordo yama tetanos-difteria (Td).