Den transcurso di e aña aki, Aruba a conoce un cantidad di sucesonan cu tin di haci cu actonan di criminalidad, specialmente cu asesinato, na unda loke ta prevalece ta hobennan cu a keda involucra den tur suceso cu a tuma luga.

Prome cu 2020 a finalisa, ya caba dia 30 di december un hoben di 15 aña a keda deteni pa e sospecha di kita e bida di un persona cu tabata pareha di un familiar door di un hinca cu el a duna na un persona di 53 aña na su pecho.

Na comienso di aña, specificamente dia 3 di januari comunidad di Aruba a confronta cu e noticia di un mucha di 16 aña cu tambe a keda deteni pa e sospecha di asesinato di su mesun welo, un suceso cu a causa impacto pa e agresividad di e delito aki, loke a laga e comunidad den shock.

Den ambos caso aki cu ta trata di muchanan menor di edad, por lo general nan no ta wordo husga como adulto, e maximo castigo pa un menor di edad den un caso di kita bida di un otro persona ta cuatro aña, cu e mester keda cera den seccion hubenil di prizon of den un instituto, pero esey ta depende di su condicion mental.

Ultimo biaha cu Aruba a conoce un caso similar di e tipo aki tabata na aña 2017 na unda un mucha muhe di 15 aña a pone veneno y tir’e den orange juice cu e intencion di mata su wela di criansa, pa e delito aki el a haya 12 luna di Jeugddetentie.

E di tres asesinato a tuma luga dia 15 di januari na unda un persona di 21 aña a wordo tira na un cas na Pos Chikito, di esaki Polis a informa cu ora e patruya a yega nan a haya un persona sinta den auto cu un tiro den su cabes, dianan despues diferente medionan di comunicacion a informa tocante e tension cu a keda den e bario di Pos Chikito despues di e asesinato aki, cu segun tabatin indicacion cu tin relacion cu problemanan di gangnan.

Dia 23 di februari Cuerpo di Polis di Aruba a anuncia cu a registra un caso di hincamento na Booby Hillweg, segun nan a informa comunidad cu na yegada di patruya ta bin compronde cu aparentemente mama lo a stroba su yiu muhe menor di edad di pone fin na su bida, un discusion a cuminsa entre e mama y su yiu pa stop di hinca su mes cu un cuchiu, nan tambe a declara cu e mama a haya un hinca den su brasa y despues e yiu muhe a hinca su mes den pecho, den hecho aki tur dos persona a resulta seriamente herida. Oranan despues por a compronde cu nan a keda stabiel.

Dia 12 di april a registra e dia 4 asesinato na unda Polis a haya e notificacion di un persona cu a wordo tira den cabes na un cas na Brasil, den e caso aki ora e patruya a yega nan a haya un persona di inicial R.H di 20 aña di edad tira abou den veranda cu un tiro den cabes, cu despues a fayece na hospital a consecuencia di e herida di bala.

E di 5 asesinato tabata dia 4 di juni cu e caso di un mucha muhe na Flamboyantstraat cu segun Polis nan a hay’e tira abou den sala cu un tiro den su cabes, tabata trata di un hoben di 20 aña di edad di inicial S.R.C Petronia, Recheche di San Nicolas a detene dos persona hende homber di 17 aña cada un cu supuestamente tin relacion conexion cu e caso aki.

Asina mes, Polis a expresa cu nan no ta sospecha cu lo tin mas detencion den e caso menciona aki na unda e dos hoben deteni ta sospecha di tin di haber cu e caso di un auto cu a los tiro riba diferente personanan di e cual 4 keda herida.

Den un comunicado cu Cuerpo di Polis di Aruba a manda ayera diadomingo, a keda conoci cu Recherche di San Nicolas a detene un persona mas pa e asesinato di dia 15 di januari.

Nan a informa cu Recherche di San Nicolas (DAR3) a detene un hende homber di inicial B.D.W naci na Aruba di 23 aña di edad, su detencion a tuma luga na su cas mes den caya Sint Lucia, asina mes nan a indica cu esaki ta di cuater detencion den e caso aki, investigacion preliminar ta mustra cu ta un problema entre gangnan, segun loke nan a sigura anteriormente.

Ayera atardi tambe a keda conoci un caso di secuestro na Tanki Leendert na unda Polis tabata negocia cu un homber cu a secuestra un muhe den cas, tocante esaki, primeramente Polis a informa cu e homber tabata cera den camber cu e muhe na unda nan tabata sospecha cu e tabatin un arma blanco den su poder.

Ekipo special a yega na e cas pa por negocia cu e persona pa asina e por sali for di cas sin cu esey lo por a tin consecuencianan lamentabel, loke a bin dilanti tambe ta cu e persona aki no tabatin status legal ni su documentonan na ordo, cu tin nacionalidad dominicano y esey tambe a forma parti di e negociacion.

Varios ora ora despues e team di aresto a kibra e porta di e cas y nan a drenta pa saca e muhe cu tabata como rehen door cu nan no a logra negocia cu e persona, na final el a keda deteni y e persona cu tabata secuestra a keda na salvo.

Siman pasa, por a compronde for di un otro medio di comunicacion cu parlamentario Alan Howell a manda un carta na presidente di parlamento Ady Thijsen pa solicita di manera urgente un reunion publico na parlamento cu minister demisionario di Husticia Andin Bikker pa loke ta trata e situacion alarmante di tiramento, incluyendo morto den area pariba di brug.

E peticion ta pa esey lo tuma luga si ta posibel e siman aki, “e prome seis luna di 2021 por a constata un cantidad alarmante di tiramento den area pariba di brug, unda diferente persona a perde nan bida” e documento ta indica.

Ta p’esey cu ta pidi presencia di minister demisionario di Husticia, Siguridad y Integracion pa duna un splicacion na parlamento y comunidad henter di e sucesonan cu a bin tuma luga na Aruba di loke ta trata criminalidad, pa tambe duna un splicacion di e situacion na e momentonan aki y pasonan corectivo of preventivo cu a of lo mester wordo tuma pa evita cu crimenan asina lo bolbe tuma luga.

Ta importante pa destaca cu criminalidad no ta sosodiendo na un parti di Aruba so, na henter isla den ultimo 6 luna manera a menciona 5 asesinato a tuma luga y e parti lamentabel ta cu den tur di nan tin hobennan di menos di 25 aña envolvi y cu tambe nan a perde nan bida, ta bon pa candidatonan cu ta haci campaña pa Husticia y Siguridad tene esaki presente na unda Aruba lo por ta sigur contra criminalidad.