Den ultimo rapport cu Departamento di Salubridad Publico a manda ayera, a registra cu ayera 4 persona a recupera, a registra total 32 caso nobo di Covid-19 for di e dia 16 di juli te ayera 23 di juli na unda 14 ta turista y 18 ta residente.
Asina mes, nan a señala cu e tasa di positividad bao e residentenan ta 16.7%, di e 18 residentenan positivo 5 ta vacuna completamente y 13 no ta vacuna of no ta vacuna completo.
Casonan activo te ayera tabata na 158 y e edad promedio di esunnan positivo ta 31 aña, tocante e cifra di fayecido nan a informa cu ta 109, ademas nan a menciona cu ta hopi importante pa remarca cu e categoria di edad cu recientemente mas ta test positivo pa Covid-19 ta e categoria di edad entre 18 cu 29 aña.
Di loke ta trata hospital, nan a señala cu tin un total 9 persona interna di cual 4 ta den ICU (3 cu Covid-19 activo, 1 cu Covid -19 no activo) 4 riba piso general y 1 riba piso di Pediatria (mucha). Segun datonan di hospital desde 1 mei un total di 57 persona a wordo interna pa motibo di Covid-19 di cual 2 (3.5%) tabata completamente vacuna y 55 no tabatin ningun vacuna of solamente a haya un vacuna so.
Ademas, DVG a informa cu 25.7 porciento di persona den grupo di edad 12 pa 17 aña ta vacuna caba, mientras cu 69 porciento di esnan cu edad entre 18 cu 59 aña a ricibi nan vacuna. 73.8 porciento di persona cu edad di 60 bay ariba tambe ta vacuna. “Vacuna pa bo ta miho protegi contra Covid-19!” DVG a bisa den un declaracion. “Vacuna ta un acto di solidaridad y responsabilidad conhunto. Niun por keda atras! Vacunacion ta e diferencia entre bida y morto!”
