(AP) – Reportenan di atleta, abogadonan y otro personanan hayando coronavirus aunke nan ta vacuna lo por zona y mustra alarmante, pero expertonan di salud ta senala na evidencia abrumador cu ta demostra cu e vacuna ta haciendo exactamente e trabao cu e a ser premira di haci, cual ta reduci dramaticamente e enfermedad severo y e fayecimento.

E miho indicador ta cu e hospitalisacionnan y mortonan na Merca ta casi completamente den e personanan cu no tabatin nan vacuna, y datonan di Britain y Israel ta apoya y comproba cu e proteccion contra casonan severo ta permanece fuerte. Loke cientificonan ta yama “casonan di avance”, cual ta ora e persona ser infecta cu e mesun virus cu e vacuna ta trata, den personanan completamente vacuna ta completa un fraccion chikito di e casonan tumando luga actualmente.

“Ora cu bo ta tende di un infeccion cu ta un caso di avance, esaki no necesariamente kiermen cu e vacuna ta fayando, of no a haci su trabao” Dr. Anthony Fauci, e miho specialista di Merca su Gobierno den enfermedadnan a conta un grupo di Senado preocupa e siman aki. “E vacunanan ta trahando”, Fauci a comenta, te hasta den momento di enfrenta e variante mas contagioso delta cual ta causando furor y preocupacion den diferente comunidadnan cu te ainda no ta vacuna.

Autoridadnan di salud a adverti cu aunke e vacunanan di COVID-19 ta increiblemente efectivo, e vacunanan di Pfizer y Moderna ta mas o menos 95% efectivo contra e infeccionnan symptomatico, segun e investigacionnan haci, esaki kiermen cu e vacunanan aki no ta perfecto, y ningun vacuna lo por yega e perfeccion aki.

Ta te ora cu e variante delta a cuminsa plama cu e riesgo di e tipo di casonan aki a cuminsa bin dilanti y a cuminsa ricibi atencion publico. E cantidad grandi di reportenan y titulonan cu ta saliendo den noticianan ta preocupando e personanan cu ta vacuna, kendenan ta preocupa cu con por yega na un balans entre e regreso na normalidad cu e cantidad di contacto social cu personanan cu no ta vacuna, specialmente si nan tin miembronan den e famia cu ta mas vulnerabel, manera muchanan cu ta hopi hoben y ta cay fuera di e cualificacion pa por ricibi e vacuna.

Fanaticonan di deporte ta mirando reportenan diario di atletanan cu a ser infecta, desde NEw York Yankees, na e Olimpiada cu ta tumando luga aworaki. Cu e Olimpiada cuminsando, Kara Eaker, un di e miembronan di Merca su ekipo di acrobacia ken a declara cu e tabata vacuna, a test positivo na un ‘training camp’ serca di Tokyo. Hungado di WNBA Katie Lou Samuelson a sali for di e Olimpiada y e competencia di basketball despues di a test positivo aunke tambe tabatin su vacuna.

E Centers for Disease Control and Prevention tin lunanan largo caba bisando cu e personanan cu ya ta vacuna no tin mester di tuma e test di coronavirus despues di a ser exponi na e virus, solamente si nan desaroya sintomanan. E agencia ta cita evidencia limita pa comproba cu e ta chens ta menos grandi cu un persona vacuna lo infecta otro personanan, compara cu e personanan cu no ta vacuna y cu ta ricibi un infeccion sin sintoma.

E casonan aki sa ta hopi leve, pa motibo cu e sistema imunologico di e persona vacuna no tin cu cuminsa for di 0 pa cuminsa combati e virus. Aunke e virus logra pasa door di e anticurpanan di vacuna, y cuminsa reproduci den e nanishi of garganta, e defensanan secundario ta cuminsa actua y usualmente “e virus ta para of muri dentro di un paar di dia” segun University of Pennsylvania su experto den imunologia Scott Hensley.