Awe den oranan di atardi, durante un conferencia di prensa di Gobierno di Aruba, Directie Volksgezondheid Aruba (DVG) a ofrece un actualisacion di cifranan pa loke ta trata e situacion di COVID-19 na Aruba.
Jurette Croes a informa cu te dia di awe tin 95 caso positivo di COVID-19, 54 caso activo, 39 persona a recupera, 1237 persona cu a wordo getest, 90 persona den cuarentena y 1142 caso negativo.
Tambe el a menciona cu durante toque de queda e personanan cu lo mester busca ayudo di cuido medico na eerste hulp prome mester informa polis, yama na e number 100 y duna datonan personal, datonan di auto y na cua bario ta bayendo busca ayudo di cuido medico.
Croes a enfatisa cu cualkier persona, sea residente of no, por bin na remarca pa haya e test di COVID-19. Den e situacion aki no ta importante e status legal di e persona na Aruba, ni mester di un carchi di AZV pa por haci test di COVID-19.
Tambe el a trece dilanti e caso di persona cu a fayece na Paradijswijk, cu tabata un persona hopi conoci den comunidad. Despues cu el a fayece ayera den oranan di marduga, a test positivo pa COVID-19. DVG ta haci un yamado pa personanan cu a haya contacto cu e persona aki entre dia 7 di april pa 14 di april, si ta presenta algun sintoma por yama na e number 280.0101.
Asina mes, a keda conoci cu e famia di persona a keda instrui pa bay den cuarentena mientras cu nan ta warda e resultado di e test.
