E cantidad di caso di COVID-19, e malesa causa pa e novel coronavirus, a surpassa 1 miyon mundialmente, segun cifranan di Johns Hopkins University
Merca tin e cantidad mas grandi di caso, cu alrededor di 236mil. Italia, Spaña y Alemania ta bin despues.
Detecta pa prome biaha na China december ultimo, e coronavirus a cambia e forma con nos ta biba – con nos ta traha, haci compras y con nos ta socialisa. Cantidad di ciudad y pais a impone lockdown pa stop e transmision di e malesa. Gobierno federal Mericano a extende su guianan di distanciamento social te cu dia 30 di april. Na Aruba, esakinan ta valido te cu dia 19 di april, pero gobierno a bisa cu lo sigui evalua e situacion, y asina e medidanan por extende mas leu. A cancela of pospone eventonan mayor, y hopi empleado ta ricibi instruccion di traha for di cas, mientras otronan a perde nan trabou.
Presidente Donald Trump diahuebs ultimo a invoca e Defense Production Act pa sigura cu fabricantenan manera General Electric, Hill-Rom, ResMed y Royal Philips por ‘sigura e suministronan cu nan mester pa construi ventilator cu ta necesario pa derota e virus’. Mientras tanto, companianan manera Apple a haci donacion di miyones di mondmask na trahadonan medico pa yuda combati escacez, mientras Boeing a bisa cu lo fabrica miles di ‘face shield’ plastico cada siman y provee avion pa transporta suministro, segun Trump.
Pa protege contra transmision di COVID-19, ta curasha hende pa practica distanciamento social, y laba nan man profundamente.
