Den nan resumen di ayera diabierna, Departamento di Salud Publico (DVG) a informa cu 9 persona a recupera na Aruba, di mesun manera a registra un total di 15 caso nobo di Covid-19, di cual 3 ta no-residente.
E cantidad total di testnan ehecuta te ayera na e diferente localidadnan na Aruba, entre otro laboratorio di hospital, laboratorionan priva y aeropuerto ta 593 test, di loke ta trata e ‘Positivity rate’ segun DVG a indica entre e residentenan ta na 8%.
Den relacion cu e casonan activo te ayera tabatin 60, e cantidad di fayecido relaciona cu Covid-19 ta na 107.
Ademas di esaki, un website di noticianan local a indica cu Rijks Instituut voor Volksgezondheid en Mileu (RIVM) a raporta cu e siman aki e variante di Brasil (P.1) ta aumentando poco poco na Aruba cu un total di 17% di e casonan di coronavirus, ademas cu un di e otro variantenan esun Britanico a baha un poco pa 46% di e totalidad di presencia di e virus Covid19 den e isla.
Manera ta conoci, e dos variante aki ta esun cu mas ta causa preocupacion pa via cu nan ta mas contagioso.
Ta importante pa destaca cu te ayera 4 di juni e casonan confirma di Covid-19 na nivel mundial tabata di 172.240.146, di e cual 120.627.774 a recupera caba, Merca ta e pais cu ta concentra e mayor number di casonan cu 33.327.911, despues ta sigui India, Brasil y Francia.
Di loke ta trata e cifra di personanan fayecido na nivel mundial ta registra 3.703.796 te dia di ayera diabierna.
