Awor cu Ministerio Publico (OM) a admiti cu polis di trafico a haci eror den e investigacion den e caso di Zinnia Croes, nos pregunta ta keda dicon OM toch lo no persigui e caso.
E mucha di 12 aña a perde su bida na 2015 ora un polis a dal e cu auto. E polis aki tabata bou influencia di alcohol. Siman pasa e mayornan a manifesta despues cu nan a haya un splicacion di OM unda a indica cu husticia a comete eror, asina nos partner den noticia Ret Karibense ta informa. Nan a duna minister di Husticia Arthur Dowers un carta cu nan preocupacionnan, entre otro cu nan ta sinti cu e chauffeur no ta wordo persigui pasobra e ta traha na polis.
Bon Dia Aruba a papia cu mama Michella Matos cu ta bisa cu nan lo cuminsa un procedura (articulo 15) contra e decision di OM pa no persigui e caso. Pa asina purba duna Zinnia su ‘fair chance’ dilanti un hues. Segun sra. Matos ta hendenan no capacita a traha ariba e caso, cual a trece e consecuencia nan aki pa e famia y pa Zinnia.
Reaccion OM
Bon Dia Aruba a tuma contacto cu vocero di OM Ann Angela pa asina por haya mas informacion riba e caso. Sra. Angela ta splica cu na e momento aki mester warda riba un contesta di corte pa asina wak si ta habri e caso bek ya cu mayornan a haci uzo di articulo 15 di Strafvordering. E articulo di ley aki ta duna espacio pa entrega un keho na corte y un hues lo dicidi si e decision tuma pa OM ta corecto of si ta manda e caso bek y ta duna ordo pa OM persigui e sospechoso. “E ta un bon cos pa entrega keho ora hende no ta di acuerdo cu un decision. E ta nos estado di derecho”, e vocero ta bisa.
Sinembargo den e caso aki polis mes a haci e eror y awor e mayornan ta forsa pa entama un caso. Nos a puntra vocero Angela cu tumando na cuenta di ta admiti un eror, si no por habri e caso bek riba iniciativa propio. E vocero a indica cu e ta prefera pa nos tuma contacto cu e minister di husticia pa mas informacion. Nos a purba tuma contacto cu e minister pa medio di algun coordinador pa un reaccion pero te na e momento aki no a logra.
