E caso di tiramento fatal na Wayaca cu a sosode riba 13 september 2016 a bay pro forma diabierna mainta den Corte. No tin tur informacion cla pues e caso no ta cera ainda pa hues por trece dilanti y duna veredicto. Dia 7 di april 2017 e caso ta bini bek den corte pa otro tipo di pro forma.
Ambos sospechoso deteni ta wordo acusa di asesinato cu nan a haci conhuntamente cu a causa morto di dama nacionalidad Chines S.S.K.F.F. door di un tiro den cabes. Ademas di esey, sospechoso Steve Fan ta wordo acusa tambe como complice di e otro persona den comete e mesun actonan aki. E sospechoso di nacionalidad Boneriano ta esun cu a tira pero sr. Steve Fan ta wordo acusa di ta un complice den esey. Como complice e ta haya e mesun castigo cu esun cu a comete e acto mes. Sr. Steve Fan ta wordo acusa di a yuda e otro persona cu cierto servicio y den cierto manera pa e otro persona bay comete e actonan aki. A keda palabra cu 7 di april 2017 lo tin un otro tipo di pro forma di e caso aki conoci manera un ‘regiezitting’. Esaki ta ora cu hues ta bay scucha e fiscal y abogado defensor pa wak si tin deseo di haci cierto actonan di investigacion. Ora cu esey ta cla segun abogado Chris Lejuez, cu ta na defensa di sr. Steve Fan: “E ora ey pronto despues di 7 di april nos lo pone mas pronto posibel un huicio mes pa trata e caso. Te aworaki nos no tin un fecha riba dje ainda. E file ta basta grandi anto ta tuma basta tempo.” E detenidonan ta dunando declaracionnan te ainda. Siman pasa mes tabata tin declaracion di un di e sospechosonan na Polis cu ta den proceso di analisis segun sr. Lejuez pa uza esaki den nan defensa.
Caso
Esaki ta un caso di atraco cu a resulta den tiramento fatal na bario di Wayaca cu seguramente a shock henter comunidad di Aruba. E victima den e caso aki tabata un dama di nacionalidad Chines inicial S.S.K.F.F. cu a ricibi un tiro den cabes cual a causa su morto. Despues di dos entrada hudicial, polis a pone man riba dos sospechoso. Esaki pues a pasa algun siman despues di e suceso unda cu na Pavia 52 a detene comerciante Steve Fan di Stevie Ice Factory como sospechoso. A detene un di dos persona tambe di nacionalidad Boneriano cu aparentemente ta traha pa Steve Fan. Na Pavia polis tambe a haya e pickup cu testigonan a mira ora a busca e sospechoso di e tiramento patras di veld di Sportboys na St. Cruz.
