Ayera mainta a tuma luga un caso sumario, caminda un ciudadano a bay corte pa entabla un caso contra e binimento di otro fast food na Santa Cruz.
Ta trata di e conocido artista plastico, Elvis Lopez kende bou representacion di e oficina di abogado mr. Rep a mustra su obhecion contra e binimento di Burger King, cerca di unda e ta biba na Sta. Cruz.
“Nos peticion ta cu nos no kier un otro Burger King den Santa Cruz of otro fast food den Santa Cruz. Den e caso aki net Burger King,” Lopez a bisa. Nan sa cu e compania no tin niun permiso cu a wordo otorga ainda, pero tin cierto actividad cu ta tumando luga, sin e permiso debido.
Ademas Elvis Lopez ta haya cu e compania no ta bay lanta un muraya, si nan no tin pensa di traha un Burger King y un drive thru, dilanti practicamente nan porta di cas. El a laga sa cu actualmente nan tin hopi dificultad cu tur e trafico na Santa Cruz. Tambe nan ta confronta e mal estado di medio ambiente, y nan no kier fast food den e districto aki.
“E ta un desaster aworaki. Tur dia e trafico ta para. Tur dia bo no por saca bo auto for di bo cura,” el a declara na salida di corte.
Lopez ta haya cu niun hende ta den nan sapato, y el a pidi apoyo di comunidad, muy specialmente di e habitantenan di Santa Cruz, pa join cu e campaña di protesta contra mas fast food den e districto aki. Ya caba nan ta sinti cu e bario aki a wordo practicamente invadi pa e tipo di negoshi aki.
Acto di benta.
Otro miembro di e famia aki ta e conocido comerciante Tito Lopez, kende a bisa cu e ta doño original di Rowigini’s Bar & Grill. E ta lamenta cu henter un proceso ta relaciona cu un problema familiar cu a conduci cu e mester ta den corte ayera mainta.
Tito Lopez a declara cu e ta un proceso basta largo cu a conduci cu edificio a wordo bendi ‘tras di mi lomba.’ E comerciante a declara cu dia 13 di november pa 3or atardi, el a haya sa cu e edificio a wordo bendi.
“Mi no a firma niun momento pa e wordo bendi,” segun Tito Lopez. Sinembargo el a prefera di no bay den detaye rond di e caso aki, ya cu e ta uno basta largo. Pero si constantemente e ta wordo confronta cu e hendenan ta puntr’e: kico a pasa cu e edificio ey cu a wordo bendi cu Burger King.
Tito Lopez a splica cu actualmente e tin dos caso cu ta andando. Un tin di haci cu e acto di benta cu no a bay corectamente, el a bisa. Y e di dos ta cu Burger King a lanta un muraya ariba su tereno, sin tene cuenta cu su opinion y derecho. A pesar cu el a hala un linea pa mustra nan unda e linea di tereno ta.
El a agrega cu nan a lanta e muraya riba e muraya di e cas di Tito su mama y tambe pabou di Rowigini’s cu intencion di bin cu un drive thru. Esaki lo haci cu tur e gas di e autonan cu lo haci uzo di e servicio aki lo bay den cas di su mama. Pero e por a tuma nota cu den corte, representante di Burger King ta bin bisa cu nan no a lanta muraya.
Tito Lopez a bisa cu Rowigini’s tabata un negoshi di famia unda su mayornan y demas miembro di famia a yega di traha. Pero e ta denuncia cu pa un motibo familiar, e negoshi a wordo bendi tras di su lomba y awor nan ta sinta cu e problemanan aki.
Defensa.
Abogado Nancy Gravenstijn di oficina Gravenstijn & Marchena a trece dilanti cu su cliente Jersinio Kock a cumpra e edificio di Rowigini’s y cu semper tabatin actividad comercial den dje, entre otro bar y night club. Y awor e propietario nobo kier bin cu otro tipo di negoshi. Pero awor e bisiñanan a bin contra di e actividad comercial aki. “Segun nos, nan no tin niun base,” e abogado a bisa.
Jersinio Kock di J&K Burger Holding a bisa cu ainda nan no tin nada concreto ni mapa pinta riba ki proyecto nan lo bini cune. El a declara cu ainda nan ta hopi curu y e compania mes no sa den cual direccion nan ta bay.
Apenas nan a caba di cumpra e luga na luna di november ultimo, y el a wordo sorpresa cu un carta pa atende un kortgeding den corte. E argumento tabata cu e bisiña no kier wak negoshi den e edificio ey, mientras cu semper tabatin negoshi den dje.
“Loke mi ta haya straño ta cu sin niun base ta bin purba di stroba economia di Aruba. Stroba cu otro hende por haya trabou, stroba den tur sentido di palabra,” el a bisa.
Sinembargo e no ta kere cu un caso asina ta contra actividad di ‘free enterprise’ na Aruba. Kock ta spera cu hues lo por evalua tur e situacionnan cu a wordo presenta y nan lo tende despues.
