Fayo di comunicacion entre instancianan

Ministerio Publico (OM) a pidi hues 15 aña di prizon pa padrastro y 4 aña pa e mama di Rishandroh y Eugene, e muchanan cu a wordo asesina.

Na cuminsamento di e sesion di corte por a nota cu tabata tin conflicto pafo pa motibo cu no kier a laga famia Anastacia y otro miembro di famia drenta paso ‘no tin luga’. Hues a intermedia y a bisa cu tur miembro di famia mester por ta presente.

E sala tabata yen di funcionarionan di OM y Voogdijraad. Hues mes a manda tur hende na e parti di ariba pa laga espacio pa e famia. Tambe a saca otro hendenan den publico cu no tabata parti di e famia. Den hues su palabra, e lo kier tin aden henter famia, miembronan di prensa y director di Voogdijraad.

Durante e oranan largo di e proceso por a nota cu e tata biologico, esta Orlando Anastacia, tabata tembla y yora cu su mirada fiha na e padrastro Gabriel Martin. Personal di siguridad di corte mester a keda banda di dje pa preveni cu algo lo por a bay robes.

Segun e investigacion haci, for di 2014 caba cu sr. Martin tabata den un relacion cu e mama Risheila Frans, e tabata maltrata mama di e muchanan. Sra. Frans no a aleha sino mas bien a sigui cu e relacion. Cos a bay mas leu, caminda cu sr. Martin a hinca sra. Frans cu un cuchiu den su pia, pa cual el a wordo condena na 6 luna incondicional. Na e momento ey instancianan no a haci un investigacion profundo den e famia. Locual Bon Dia si a haya sa ta cu e caso di hincamento a keda y ‘muri’ na polis. Pues e no a yega na instancianan manera Voogdijraad na e momento ey. Algo cu awor gobierno ta purbando di drecha ta pa instancianan tin miho intercambio di informacion pa evita casonan asina.

Na juli 2017 sra. Frans a huur un apartamento y despues di dos siman hunto cu sr. Martin a bay biba den esaki. Te cu na augustus/september e muchanan a bin biba hunto cu nan. Segun e mama, e abuso tabata constantemente. E tabata yega for di trabou anto tur dos mucha tabata keha di dolor, y tabata ripara blousa na nan curpa. A yega asina leu cu un di e muchanan no por a cana di e golpinan na su pianan. E abuso tabata mas pisa cu Rishandroh (5 aña).

E padrastro a admiti cu el a dal e mucha cu palo di basora y cu mokete riba curpa y cabes. Ora fiscal a puntra si e tabata kima e mucha cu awa cayente. El a nenga y bisa cu esaki tabata un accident. Sr. Martin tambe a nenga cu e marca di sigaria riba Rishandroh su curpa ta di dje. Den declaracion sra. Frans a admiti cu su pareha sr. Martin ta un persona hopi agresivo.

Rishandroh a fayece na november y segun autopsia ta bisa, a haye cu basta golpi, kemadura, rasca y varios weso kibra. El a fayece e siguiente dia na hospital. Ora esaki a sosode, di biaha Voogdijraad y polis a drenta den e caso pa purba scapa e bida di e dos mucha. Na e momento ey a bin haya sa cu Eugene (3 aña) tabata desapareci. A tuma Anthony, e di tres yiu for di su mama pa hib’e Casa Cuna.

Un buskeda a cuminsa pa haya e curpa di Eugene y despues di algun dia e padastro a confesa cu e mucha a muri y el a der’e na Savaneta bou un palo di kiwi. Segun sr. Martin a confesa, dia cu el a mata Eugene, e la dal su cabes na pot di WC, a consecuencia e mucha muri. Ora e mama a yega a haya e mucha curpa biña y a ripara cu e no ta duna señal di bida. Segun e mama, e kier a bay cerca polis pero sr. Martin a menasa cu si e sali fe cas, e ta mata e hunto cu su yiunan. Pa e motibo aki e no a busca ayudo.

Ora tur e declaracion tabata wordo haci, por a ripara cu sr. Martin tabata reacciona trankil, sin mustra ningun emocion. Sr. Martin a remarca si ‘mi a pasa mas tempo cu e muchanan cu e mesun tata’. Segun declaracion di psikiatria, sr. Martin tin ‘persoonlijke stoorniss’ y varios problema mental. Den e caso di sra. Frans el a bisa cu e por ta sufri di ‘Stockholm syndroom’, locual nifica cu e persona ta custuma cu abuso anto ta haya un afeccion pa esun cu ta maltrate. Miembro di famia Frans a declara cu nan a mira e mama ta disciplina e muchanan ‘duro’ pero sra. Frans a bisa e tabata haci esey pero sin maltrata.

OM a reacciona hopi fuerte riba e expresionnan haci den media y reaccionnan riba social media unda hopi hende ta exigi cu mester duna castigonan maximo den e caso aki. Fiscal a bisa cu den e caso aki mester wak ambos banda. Pasobra e sospechosonan mes a bin for di un pasado yena cu violencia y cu nan tin problemanan mental. Tambe tin e aspecto cu e mama mes tabata bou menasa continuamente.

E famia no a keda satisfecho cu locual fiscal a pidi, nan ta haya cu e personanan aki merece un bida largo cera. Rishandroh y Eugene, manera por a mira cla den e sala di corte awe, no tabatin niun ayudo cu un bida asina cortico y a experiencia puro violencia.

Hues lo dicta e veredicto dia 6 di july 8:15 di mainta pa Gabriel Martin. Lo habri caso di Richeila Frans bek pa motibo cu ainda mester haci mas investigacion den su salud mental. Cual nan lo busca specialista den psikiatria pa asina studia e caso di sra. Frans su salud mental miho.