Den cuadro cu e caso sumario cu periodista Nelson Speed Andrade a lanta contra parlamento en conexion cu su suspension pa tres luna for di parlamento, hues J. Sap a dicta na fabor di Andrade pa pais Aruba dentro di 24 ora di e veredicto aki, pa permiti Andrade drenta bek den parlamento mescos cu cualkier otro miembro di prensa Arubano y bao tur e mesun condicionnan.

E decision di hues den e caso sumario cu periodista Nelson Speed Andrade a entama contra gobierno y parlamento di Aruba den cuadro cu un decision cu parlamento a tuma pa prohibi Andrade pa drenta e edificio pa un periodo di tres luna. Esaki segun e presidente di parlamento Ady Thijsen (MEP) ta pasobra sr. Andrade a critica e maneho di e presidente riba su programa di radio y hasta menasa cu e por ‘haci kico cu e kier’.

Manera nos a publica ayera, hues caba tabata dunando indicacion unda e tabata di bay cu su decision pasobra el a keda insisti pa presidente di parlamento trece claridad riba cua base dia autoridad a sanciona e periodista. Hues a indica den su sentencia cu e presidente di parlamento a uza autoridad cu e no tabata tin basa riba emocion, cual corte no ta haya husto. Pues a ordena pa sr. Andrade wordo permiti pa drenta bek edificio di parlamento dentro di 24 ora cu e veredicto wordo presenta. Tin posibilidad pa apela e sentencia cual presidente di parlamento a menciona diamars pafo di corte pero e veredicto mester wordo ehecuta mesora.

Autoridad limita
E veredicto ta mustra cu no tabata tin base pa a prohibi un persona for di e edificio unda cu tampoco e presidente di parlamento por a hustifica su defensa ayera. Basa riba e reglanan cu tin den parlamento segun hues, ta mustra cu e autoridad di e presidente pa actua den cierto cos ta limita.

A wordo subraya tambe cu e presidente no tin autoridad tampoco pa tene un persona pafo di parlamento pa un tempo largo. E hues a indica cu e presidente ta bruha su autoridad pa stipula regla y duna sancion. E presidente di parlamento ta bisa cu e por stipula regla na bishitantenan di parlamento manera codigo di vestuario y kico ta permiti of no pa haci ora ta paden di Staten. Sinembargo segun e veredicto ta indica e autoridad aki no ta bay asina leu tampoco unda cu por straf of prohibi un persona pa drenta parlamento.

E hues a mustra cu un prohibicion asina riba mesa lo trece peliger na Aruba y libertad di prensa. Den corte diamars abogado na defensa di sr. Andrade, David Kock, a trece dilanti cu presidente di parlamento ta haci manera cu sr. Andrade ta un tipo di terorista cu ta terorisa parlamento. No por a compronde pa kico a baha asina pisa riba dje specialmente pa via di cosnan cu sr. Andrade a comenta pafo di e edificio.

Caso
Presidente di parlamento sr. Thijsen ta enfatisa cu henter e asunto aki ta pasobra e periodista a no solamente yega drenta manera cu e kier den edificio di parlamento, pero el a bay na radio comenta cu e por ‘haci kico cu e kier’ eynan. “Andrade a bay riba radio y bisa cu nan a sancion’e mientras cu no ta berdad. Di dos e ta bisa cu ningun hende ta bay bis’e si e por drenta parlamento si of no. Nos tin articulo 82 cual ta e unico cos cu nos tin cu ta bisa cu mi por stel regla. Kiermen ken cu ta, nos tin cu haci algo y no warda pa cos pasa.”

El a bisa cu e periodista a drenta for di porta di patras. A bin dilanti den corte ayera cu ningun trahado di siguridad a wak e drenta mientras e mester meld su mes dilanti ora di drenta. Pero esaki segun defensa di sr. Andrade ta incorecto pasobra tin prueba cu el a drenta via portanan oficial pa haci un entrevista den parlamento. Un personal di siguridad a lag’e pasa, e no a logra haya su entrevista cu lider di fraccion MEP Rocco Tjon anto a djis bay haci su reportahe riba e stoel di parlamento. Esaki a pone cu parlamento a manda un carta pa e medio di comunicacion 24ora recordando riba reglanan y cu esaki no por sosode mas. Sr. Andrade a bay riba su programa di radio y critica e ponencia aki anto akinan el a haya e prohibicion pa drenta parlamento pa tres luna.

Hues a indica den su veredicto cu el a scucha e declaracionnan cu sr. Andrade a haci riba radio y constata cu nada di loke s. Andrade a bisa tabata un menasa na parlamento of na presidente di parlamento. A subraya cu no por tuma medida riba hende pa cosnan cu ta pasa pafo di parlamento.

Akinan por lesa e: VONNIS