Den Bon Dia Aruba di 16 di januari a keda publica un articulo tocante un caso di RIU hotel. E articulo aki ta basa completamente riba un vonnis di Corte di Prome Instancia (GEA) caminda a atende un caso sumario na november di 2016. Tanto e hotel como tambe abogado defensor a keda sorprendi cu e articulo treci pa dilanti y tabata tin e percepcion cu esaki lo a bin a base di un opinion di Bon Dia Aruba. Despues di splicacion di nos parti, e hotel a haci un invitacion pa duna un splicacion amplio pa loke ta nan banda di medaya.

Durante e reunion tabata presente di parti e hotel Juan Blanco kende ta General Manager (GM) como tambe e abogadonan cu ta representa e hotel Lianne Pieters y Ronny Wix. E reunion a inicia cu comprension di e GM y e abogadonan riba e articulo treci pa dilanti. Ambos abogado ta comprende cu locual a keda publica ta basa riba locual cu e sentencia ta bisa. A sigui na comenta di biaha cu e manera cu e sentencia a keda publica, ta duna impresion eroneo di e situacion real y ta wak e manera un eror den e proceso cu e Hues Vanwersch a uza pa trata e caso aki.

“Huesnan ta hende mescos cu nos y nan tambe sa comete eror,” tabata comentario di abogado Wix. E abogado ta splica cu a laga afo detayenan den e parti di evaluacion (beoordeling) pa loke ta e defensa treci pa dilanti di nan parti, referiendo na seccion 3 inciso 3 di e sentencia.

Abogado Pieters a keda sorprendi ora a lesa e sentencia y ta bisa cu e declaracion duna door di e trahado a bin dilanti despues cu hues ya a cera e caso. E abogado no ta comprende dicon a inclui esaki den e sentencia, hasta pa bay asina leu di duna e trahado rason creando e impresion cu RIU lo ta actua na un manera iresponsabel cu su clientenan. A puntra e abogadonan si a entrega un obhecion contra di e decision di hues pa cual nan a contesta, “Asina cu nos a lesa e sentencia, den menos di 24 ora a apela riba e decision.” E abogado Pieters ta sigui comenta, “Mi tabata den contacto cu e abogado di e trahado y hasta e a bisa mi cu ta parce cu hues no a comprende e caso”.

Kico a bay robes
Sr. Blanco a splica e origen di e “problema” ta cu a nenga di duna e trahado un pakete pa bay for di e compania. E trahado lo a pidi pa esaki (suma di 40.000 florin) pero e hotel no a mira motibo pa dun’e un pakete si e ta bayendo a base boluntario. Desde e momento aki e actitud di e trahado a cambia por completo y posiblemente bou conseho di su abogado a stop di firma tur papel cu ta bin di parti di RIU. E GM ta pone enfasis cu contrario na e declaracion di e trahado, na niun momento a oblig’e di firma un documento cu no ta cuadra cu e berdad.

Bon Dia Aruba a haya e oportunidad pa revisa e control sheet cu ta wordo uza pa e hotel y di berdad por constata cu e trahado den posicion di supervisor tin full control pa declara locual cu e kier. Pa e motibo aki, e dirigente ta lamenta cu hues a tuma e declaracion di e trahado despues cu a cera e caso sin duna e hotel oportunidad pa splica nan banda.

E boternan di alcohol

Contrario na e impresion cu e sentencia ta duna riba e boternan di alcohol, RIU ta demostra cu aki no ta trata di boternan chikito sino di boternan mas grandi cu bo no por djis yega refill. Bon Dia Aruba a haya un recorido den diferente camber cu nos mes por a scoge for di cual por a constata cu den e cambernan tin un mini bar cu tin entre otro 4 boter cera den un cashi traha di palo y glas cu su lock. Den e cashi aki tin un boter di whisky, un vodka, un rom y un brandy. Cada boter tin su dispenser cu ta saca e contenido solamente ora pusha contra di e dispenser cu un glas. Na e dispenser tin plastic poni cual segun sr. Blanco ta declara, esakinan ta wordo cambia cada biaha cu tin un huesped nobo.

Refill boter
Riba e pregunta si ta refill e boternan of no, tanto e GM como e bar manager sr. Alonso ta splica cu ora un huesped nobo drenta e camber, e ta haya e 4 boternan manera e huesped prome a laga nan. Si tin algo cu a caba, e huesped ta notifica front desk y na su turno nan ta manda un persona pa refill esakinan. Na banda di esaki, tin un control diario cu ta tuma luga y ta re-stock e bar segun tin necesidad. E hotel tin su maneho di con ta atende cu e bar cual ta encera entre otro con e labelnan di e boternan mester ta posiciona, ki cantidad di cada producto mester tin y e higiena cu tin rond di esaki. E GM y e bar manager a splica cu tin un huesped specifico cu ta gusta pa semper su boternan ta mustra yen, pa cual su dilanti ta refill boternan cu e mesun producto. Segun e dirigente, e huespednan no por asumi cu nan ta yega haya un boter nobo pasobra aki no ta trata di mini boter. Tambe ta pone enfasis cu na niun manera ta expone huespednan na posibel peliger di malesanan transmiti oralmente ja cu manera anteriormente menciona, tur cos ta pasa via un dispenser.

E director di e hotel tambe a mustra cu no ta refill e boter cu marcanan mas barata. El a mustra cuentanan unda por mira e cantidad di boter cumpra, tur na companianan local.

Pakico no a sigui e caso
Un di e preguntanan principal rond di e tur e susedido ta pakico no a sigui cu e caso? For di splicacion y declaracionnan haci pa e abogadonan Pieters y Wix, por conclui cu si bay den apelacion e caso ta uno gana. E abogadonan ta splica cu nan ta wak e aspecto financiero di nan cliente y ta pone den un balansa si di berdad ta bale la pena sigui cu e caso. Den e caso specifico aki, despues di e ricibi e peticion for di abogado di e trahado pa sinta na mesa, a dicidi di yega na un areglo y no sigui mas den corte. Pieters y Wix ta splica cu pa bay den un ‘bodem procedure’ ta costo y ta consumi hopi tempo pues a prefera di yega na un acuerdo. “E abogado den mi kier sigui bringa e caso aki pero e bienestar financiero di e cliente ta bin na prome luga”, sra. Pieters ta comenta. Si ta pe, lo sigui bringa e caso pero e ta comprende cu pa ora yega na un sentencia nobo, e factor pa recupera tur costo haci no ta faborabel pa RIU.

Imagen di hotel
Bon Dia Aruba tambe a puntra director Blanco dicon no a saca un declaracion indicando cu locual e trahado a declara den corte no tabata cuadra cu berdad. Den sentido cu sentencianan ta publico y asina e mal percepcion por keda biba den comunidad. Sinembargo e maneho di RIU ta pa no reacciona publicamente riba casonan asina, siguramente ora ta den corte. Tambe parti di e areglo cu e trahado ta cu ambos partido no ta divulga informacion. Nos tambe a puntra si e GM awor no ta tin miedo cu mas trahado por uza e forma aki pa haya un pakete, como cu nan ta mira tambe cu e trahado finalmente a logra mirando e areglo cu el a haya. Sr. Blanco ta contesta cu e tin confiansa den su trahadonan; y di 420 empleado trahando na RIU Antiyas, solamente 3 pues su tempo (2 aña como director) a bay (di cual uno pasobra e señora a fayece).