Manera ta conoci, caso Portulaca a cuminsa na juni cu detencion di tres persona na e momento ey, recientemente un otro persona tambe a keda deteni pa e mesun caso aki e cual ta un investigacion di Landsrecherche tocante permisonan di estadia otorga.
Landsrecherche, bao guia di hues-comisario y Ministerio Publico y den cooperacion cu Cuerpo Policial di Aruba y RST (Recherche Samenwerkingsteam), a tene doorzoekingnan awe na 6 sitio, esta, dos cas, dos negoshi, Bestuurskantoor (Ministerio di Integracion, Labor y Energia) y DIMAS. E doorzoekingnan aki a tuma luga den cuadro di un investigacion di Landsrecherche di posibel delitonan di corupcion y otro hechonan castigable relaciona cu otorgamento di permisonan di estadia entre 2020 y
2022.
E investigacion aki a bira conoci bou di e nomber di Portulaca. Durante e doorzoekingnan, a tuma gegevensdragers (portadornan di dato) y administracion den beslag. Te na e momento aki, 3 persona a keda deteni.
E investigacion di Portulaca ta draai rond di e pregunta si companianan por a obtene permisonan di estadia pa nan empleadonan a base di motibonan cu no ta cuadra cu ley.
E doorzoekingnan di 4 di juni a keda conclui. E investigacion penal ta sigui. Ministerio Publico no a duna mas informacion. Den caso di desaroyonan particular den e investigacion esey lo wordo comunica despues pa medio di un comunicado di prensa, segun loke Ministerio Publico mes a señala e tempo ey.
Recientemente, un otro persona relaciona cu e caso a ser deteni e cual durante interogacion na Landsrecherche e sospechoso aki deteni a bira malo.
Diaranson merdia a drenta informe di cu durante interogacion e sospechoso su presion a bay halto y mester a yama pidi ambulans p’e. Na yegada di e ambulans nan a atende y el a relaha y asina por a sigui cu su interogacion. Atardi e vehiculo di transporte por a hib’e back na unda e ta deteni.
Di su parti, e mandatario encarga cu e cartera di Integracion, Energia y Labor, Glenbert Croes a indica cu e caso aki, ta un investigacion cu ta data di aña 2020-2022. Minister Croes a tuma e cartera di integracion na November 2021, cu e meta pa traha na combati corupcion den e departamentonan bou di su encargo, pero specialmente den e proceso di otorgamento di permiso na esnan cu ta cumpli cu e rekesitonan. Pa e motibo aki, el a instrui na e departamentonan concerni, pa duna ful cooperacion na e investigacion cu Ministerio Publico ta haciendo. Tambe, e mandatario ta confirma su pleno confiansa den e imparcialidad, eficiencia y efectividad di e investigacion di Ministerio Publico, paso ta asina so lo por duna claridad na dudanan, erornan cu ta wordo cometi.
Un di casnan cu landsrecherche a bishita relaciona cu e investigacion, ta cas di e mama
di minister Croes, na unda e fundacion ‘Union ta Forsa’ cu a wordo reactiva pa campaña
2021 y cu despues di eleccion ta inactivo. Ta importante tambe pa tuma nota cu e
señalamento di personanan y/of empresanan, no tin nada di haber cu e fundacion cu a ser
lanta pa minister Croes su campaña, segun e minister mes a senala den un comunicado.
