Ayera tardi a trata e caso di asesinato di Poentje Castro ‘pro forma’ caminda cu hues a indica cu e caso lo wordo trata integralmente dia 25 di maart 2022. Den e caso penal aki, Sr. A. Rasmijn ta wordo acusa pa Ministerio Publico di asesinato, intencional y premedita, di e conocido Poentje Castro.
Fiscal di Ministerio Publico, Sr. Partick van der Biezen a indica cu aunke mientras cu hues a stipula fecha caba pa trata e caso penal integralemnte den corte, tin pregunta di parti di defensa cu a bin dilanti y a indica cu segun defensa e sospechoso no ta apto pa para dilanti hues. Sr. van der Biezen ta esaki ta un pregunta legal na unda cu defensa a trece dilanti y ta pidi hues pa schors e caso, locual ta nifica cu e proceso penal no por sigui. Pero el a splica cu pa contesta e pregunta di defensa, hues mester di un rapport psikiatrico y segun van der Biezen a indica, esey ta locual cu lo pasa y den dos luna e psikiatra lo traha riba e rapport cu y mester ta cla prome cu 15 di februari mirando cu 16 di februari ta stipula pa e caso wordo trata den ‘pro forma’ un biaha mas y despues, dependiendo di e rapport psikiatrico lo pasa pa trata e caso integralmente dia 25 di maart.
Fiscal a remarca cu polis a haci un bon trabou den e caso aki unda cu na cuminsamento di aña nan a revisa e “cold case” aki y segun el a señala, danki na e esfuerso di polis, conhuntamente cu Ministerio Publico nan por yega na puntonan concreto cu a permiti nan yega na e sospechoso cu ta deteni awe.
E asesinato di Sr. Castro a tuma luga 10 aña pasa y e ta hopi tempo cu ningun detencion a wordo haci. Pero segun e fiscal a indica e tempo ey e nomber di e sospechoso, A. Rasmijn, a wordo menciona caba, pero lametablemente no a duna mas detaye di esey mientras cu e caso no wordo trata integralmente. Pero tin pruebanan cu a yuda Ministerio Publico yega na puntonan concreto, despues di 10 aña, cu yudanan logra yega na e sospechoso aki.
Abogado di A. Rasmijn Sr. Vito Carlo, tambe a splica cu e tabatin discusion for di comienso cu e fiscal pasobra den su opinion corte mester determina e ‘ziekte gestelde’ di su cliente pa wak si e por ta deteni y pa determina si nan por vervolg e caso penal.
El a indica cu di comienso fiscal no tabata di acuerdo cu locual Sr. Carlo a bisa, pero despues e defensa a logra convence hues comisario y convence hues tambe cu ta importante pa determina e ziekte gestelde di e sospechoso . “Ami ta di opinion cu tanten cu no determina e ‘ziekte gestelde’ di mi cliente, eigenlijk mester para tur cos”, Sr. Carlo a bisa.
Abogado Carlo tambe a menciona, cu e ta describi manera “poco straño” ta cu su cliente a haci uso di su derecho di silencio y esey a sali na cla ariba algun publicacion di prensa. Segun el a señala, el a scucha den media informacion cu ta, indicando cu e algun medio di comunicacion tin informacion cu en realidad no mester ta publico, cu su cliente ta haciendo uzo di su derecho di silencio. “Con esey ta posibel? Esey kiermen cu informacion ta wordo saca y e por tin influencia riba e caso”, el a comenta.
Sr. Carlo a enfatisa algo cu e no ta di acuerdo cu e forma cu locual Ministerio Publico ta haciendo pa loke ta trata e caso aki. El a indica, cu den su opinion, Ministerio Publico ta bringando e caso aki den prensa, dunando relatonan di prensa. “Pakico mi no ta di acuerdo cune, ta pasobra e caso aki ta un caso bieu anto hopi di loke tin tabatin caba 10 aña pasa”, el a bisa.
“Nan no a wak rason pa detene mi cliente nan no a wak rason pa vervolg e, saca un relato di prensa dia 26 di april y diripiente despues supuestamente tin tipnan a drenta, a detene un compañero sospechoso y asina e cos a cuminsa lora te cu nan a yega na e suposicion cu ta mi cliente”.
El a subraya cu e caso ta wordo influencia door di e prensa y el a indica cu aworaki cu e declaracion di cualkier hende, despues di e relato di prensa cu a sali, lo por cuadra sin cu el a wordo influencia door di prensa y esey ta e putonan el a trese dilanti, aunke e tabata na altura cu nan no lo wordo discuti durante e pro forma di ayera.
“Ami kier a pone nan ariba mesa pa despues hues no bisa cu mi no a trece pa dilanti. Mi a leg over tur e press releasenan di tur e medionan di prensa pa mustra cu mi no ta di acuerdo con e ta canando, prensa tin influencia ariba e caso penal y den mi opinion e tin resultado negativo ariba e vervolg di Ministerio Publico, nan ta tirando nan mes den nan pia” el a agrega.
Durante e pro forma hues a bisa cu nan a mira e acusuado cu un saco di papel den un video y Sr. Carlo kiermen cu esaki no ta corecto, locual el a bisa ta cu e compañero sospechoso a bisa, na momento cu el a wordo deteni y a cuminsa papia, y ta locual hues a referi na dje, ta cu e sospechoso lo tabatin un saco pa warda cos y eyden lo tabatin un arma, esey ta loke e compañero sospechoso a bisa, asina Sr. Carlo a splica.
En caso cu e caso penal aki no por bay door contra sospechoso Rasmijn, e no por wordo poni den libertad di tur forma pasobra e tin otro caso den su contra. Abogado Carlo a splica cu e sospechoso a wordo deteni mientras e tabata deteni caba pa un otro caso, dus e otro detencion a wordo para y si na momento cu e wordo declara liber of si dado momento e logra sakele, e ora e otro caso, e otro detencion ta cuminsa cana atrobe.
