Cuminsamento di e aña aki arena politico a cuminsa cu yen movecion, entre nan den Partido Democracia Real (PDR). Despues cu a keda conoci cu Andin Bikker lo ta formando parti di un partido nobo pa eleccion 2017, a start un problema interno den PDR caminda lo a trata na bin cu un directiva nobo pa tuma mando di e partido.
E directiva nobo di PDR lo ta consisti di entre otro Alonso Tromp y Lisette Gomes; ambos persona a aparece riba lista di 2013 pa e partido. Sr. Tromp y sra. Gomes conhuntamente cu mas miembro lo a yama un reunion general pa asina eligi e directiva nobo.
Na momento cu a bay pa inscribi e directiva na Camara di Comercio (KVK), e proceso lo a keda pega ya cu presidente actual di PDR Andin Bikker a manda un carta pa KVK indicando cu e inscripcion di e grupo nobo ta ilegal. KVK a opta pa no honra e inscripcion y ta prefera di laga e decision den man di corte.
Status actual
E grupo nobo cu ta considera nan mes e directiva real a entrega un verzoekschrift na corte y asina a inicia un proceso legal. Segun un di e miembronan di e directiva nobo, na e momento aki corte a duna KVK oportunidad te cu 25 di april 2017 pa duna un splicacion y motivacion di e motibo cu a nenga nan inscripcion den e registro.
Den un reaccion pa Bon Dia Aruba, sra. Gomes ta splica cu no ta comprende con KVK a tuma decision den presenta un encuesta, lagando PDR afo di esaki mientras cu nan a haya un carta di corte cu nan mester asumi responsabilidad na dje (referiendo na e caso di corte cu ta pendiente). “Kico, Serge Mansur tin influencia ainda eynan(KVK)?”
Bon Dia Aruba lo ta buscando reaccion di sr. Bikker y tambe di KVK riba e asunto aki.
